گوجرانوالہ: ڈکیتی کے دوران لڑکی سے جنسی زیادتی کا معاملہ، حنا پرویز بٹ کی متاثرہ لڑکی کے گھر آمد

گوجرانوالہ ،باغی ٹی وی( نامہ نگار محمد رمضان نو شاہی )جی ٹی روڈ پر ڈکیتی کے دوران لڑکی سے جنسی زیادتی کا معاملہ۔وزیراعلی پنجاب مریم نواز شریف کی ہدایت پر چیئرپرسن پنجاب وومن پروٹیکشن اتھارٹی حنا پرویز بٹ کی متاثرہ لڑکی کے گھر آمد،ملزمان کو چوبیس گھنٹوں میں گرفتار کرنے کی یقین دہانی۔

تفصیلات کے مطابق چار روز قبل جی ٹی روڈ پر ڈکیتی کے دوران لڑکی سے جنسی زیادتی کے معاملے میں گذشتہ روز سی ایم پنجاب مریم نواز کی ہدایت پر چیئرپرسن پنجاب وومن پروٹیکشن اتھارٹی حنا پرویز بٹ کی متاثرہ لڑکی کےگھر آمد۔حنا پرویز بٹ نے متاثرہ لڑکی اور اسکے اہلخانہ سے ملاقات کی اور انصاف کی یقین دہانی کروائی۔

انہوں نے میڈیا سے گفتگو کرتے ہوئے کہا ہے کہ ہمیں دکھ ہوتا ہے جب کسی عورت کو جنسی زیادتی کا نشانہ بنایا جاتا ہے۔ہمارے معاشرے میں عورت کے معاملات میں رواداری صفر ہے۔انہوں نے کہاکہ سی ایم پنجاب مریم نواز کا کہنا ہے کہ عورت ہماری ریڈ لائن ہے۔چوبیس گھنٹوں میں ملزمان کو گرفتار کرلیا جائیگا۔

لڑکیوں کے ساتھ زیادتی کرنے والے سفاک ملزمان کو عبرت کا نشان بنائیں گے۔ہمارا ویژن پنجاب کی تمام بچیوں کو تحفظ فراہم کرنا ہے۔اگر ایسے ملزمان کو سخت سزا نہ دی گئی تو ہماری بچیاں جنسی تشدد سے محفوظ نہیں رہ سکتی۔