پاکستان نے بھارتی وزیراعظم کے الزامات کو سختی سے مسترد کر دیا

پاکستان نے بھارتی وزیراعظم نریندر مودی کے حالیہ بیان کو سختی سے مسترد کر دیا ہے۔ دفتر خارجہ کی ترجمان ممتاز زہرا بلوچ نے اس بات پر زور دیا ہے کہ پاکستان خطے میں امن کے فروغ کے لیے پُرعزم ہے اور بھارت کی طرف سے عائد کردہ الزامات بے بنیاد ہیں۔ممتاز زہرا بلوچ نے اپنے بیان میں کہا کہ بھارت دہشت گردی کے الزامات دوسروں پر لگانے کے بجائے اپنی داخلی صورتحال پر توجہ دے۔ انہوں نے بھارت پر الزام لگایا کہ وہ دوسرے ممالک میں ٹارگٹ کلنگ میں ملوث ہے اور اس کے اقدامات خطے میں امن کے قیام کے لیے نقصان دہ ہیں۔
ترجمان دفتر خارجہ نے واضح کیا کہ پاکستان کسی بھی جارحیت کے خلاف اپنی سالمیت کا دفاع کرنے کے لیے پوری طرح تیار ہے۔ انہوں نے کہا کہ پاکستان بھارت کے جارحانہ اقدامات کا مقابلہ کرنے کے لیے تیار ہے، مگر اس کا مقصد خطے میں امن اور استحکام برقرار رکھنا ہے۔یہ ردعمل نریندر مودی کے حالیہ بیان کے بعد آیا ہے، جس میں انہوں نے 25 سال قبل کارگل جنگ کے موقع پر پاکستان پر الزامات عائد کیے تھے۔ مودی نے کہا تھا کہ پاکستان دہشت گردی اور پراکسی وار کے ذریعے اپنی اہمیت برقرار رکھنے کی کوشش کر رہا ہے، لیکن ان کے منصوبے کبھی کامیاب نہیں ہوں گے۔پاکستان نے بھارتی وزیراعظم کے الزامات کو مسترد کرتے ہوئے کہا ہے کہ ایسے بیانات خطے کے طویل المدتی تنازعات کے حل میں رکاوٹ ڈال سکتے ہیں اور ان کا مقصد کشیدگی کو بڑھانا ہے۔