جے یو آئی ایف کا اسرائیلی جارحیت کے خلاف ملک بھر میں مظاہروں کا اعلان

اسلام آباد: جمیعت علماء اسلام (جے یو آئی ایف) نے اسرائیلی جارحیت کے خلاف کل جمعہ کو ملک بھر میں مظاہرے کرنے کا اعلان کیا ہے۔ مولانا فضل الرحمان کے حکم پر حماس کے رہنما اسماعیل ہنیہ کو خراج عقیدت پیش کیا جائے گا۔جے یو آئی ایف کے ترجمان اسلم غوری نے کہا ہے کہ پاکستانی مسلمان اسماعیل ہنیہ کو شہید کرنے کے گھناؤنے جرم کی پاداش میں اسرائیل کے خلاف مظاہروں میں شریک ہوں۔ انہوں نے کہا کہ اسماعیل ہنیہ شہید کے قتل کے دکھ کو ہر پاکستانی محسوس کرتا ہے اور کارکن بھرپور مظاہروں کی تیاری کریں۔ترجمان نے مزید کہا کہ ملک کے چھوٹے بڑے شہروں میں بھرپور احتجاجی مظاہرے کیے جائیں گے۔ خطباء اپنی تقاریر میں اسرائیلی جارحیت کو بے نقاب کریں گے اور عوام کو اس بات پر زور دیں گے کہ وہ فلسطینی بھائیوں کے ساتھ یکجہتی کا مظاہرہ کریں۔

انہوں نے کہا کہ پاکستانی عوام اور جے یو آئی کارکن اسرائیل اور اس کے حواریوں کو پیغام دیں گے کہ ہم اپنے فلسطینی بھائیوں کے شانہ بشانہ ہیں۔ اسلم غوری نے مزید کہا کہ یہ مظاہرے اس بات کا ثبوت ہوں گے کہ پاکستان کے عوام فلسطینی عوام کے ساتھ کھڑے ہیں اور ان کی حمایت میں کسی بھی قسم کی قربانی دینے کے لیے تیار ہیں۔اس موقع پر جے یو آئی ایف کے رہنماؤں نے عوام سے بھرپور شرکت کی اپیل کی اور کہا کہ اس مظاہرے کے ذریعے ہم دنیا کو یہ پیغام دیں گے کہ پاکستان کے مسلمان اپنے فلسطینی بھائیوں کے ساتھ ہیں اور اسرائیلی جارحیت کے خلاف اپنی آواز بلند کرتے رہیں گے۔