وزیر داخلہ نے اسلام آباد میں سفاری پارک پراجیکٹ کی اصولی منظوری دے دی
![mohsin](https://baaghitv.com/wp-content/uploads/2024/04/dakhla-mohsin-naqvi.png)
وفاقی وزیرداخلہ محسن نقوی کی ہدایت پر اسلام اباد کے شہریوں کو عالمی معیار کی تفریحی سہولتوں کی فراہمی کا شاندار پلان تیار کر لیا گیا ہے ۔ جس کے تحت پاکستان کا سب سے زیادہ خوبصورت اور انٹرنیشنل سٹینڈرڈ کا پہلا سفاری پارک اسلام آباد میں بنے گا۔
وفاقی وزیرداخلہ محسن نقوی نے سفاری پارک پراجیکٹ کی اصولی منظوری دے دی ہے۔ سفاری پارک 200 ایکٹر اراضی پر مشتمل ہوگا۔ جس میں مجموعی طور پر 5 ہزار جانور، پرندے رکھے جائیں گےجبکہ پہلے مرحلے میں 2 ہزار جانور اور پرندے رکھے جائیں گے۔ وزیرداخلہ محسن نقوی نے سفاری پارک کی ورلڈ ایسوسی ایشن آف زو اینڈ ایکوریم سے رجسٹریشن کرانے کی ہدایت کی ہے۔وفاقی وزیر داخلہ محسن نقوی کی زیر صدارت سی ڈی اے ہیڈکوارٹر میں اجلاس منعقد ہوا۔ اجلاس میں سفاری پارک کے قیام کے حوالے سے تجاویز کا جائزہ لیاگیا۔ چئیرمین سی ڈی اے محمد علی رندھاوا نے سفاری پارک کے قیام کے پراجیکٹ کے حوالے سے بریفنگ دی۔ وزیرداخلہ محسن نقوی نے اس سلسلے میں منصوبے سے متعلقہ امور جلد طے کرنے کی ہدایت کی اور کہا کہ تمام معاملات کو فوری طور پر حتمی شکل دی جائے۔ وزیر داخلہ محسن نقوی نے کہا کہ اکتوبر میں سفاری پارک کا سنگ بنیاد رکھا جائے گا اور سفاری پارک سے اسلام آباد کی سیاحت میں اضافہ ہوگا۔