کندھ کوٹ: سنسنی خیز واقعہ، ڈکیتی کی کوشش میں ایک ڈاکو ٹریلر کے نیچے آکرہلاک

کندھ کوٹ،باغی ٹی وی (نامہ نگارمختیاراعوان ) سنسنی خیز واقعہ، ڈکیتی کی کوشش میں ایک ڈاکو ٹریلر کے نیچے آکرہلاک

تفصیلات کے مطابق کندھ کوٹ میں علی شاہ لاڑو کے قریب واقع انڈس ہائی وے پر ڈاکوؤں کے ایک گینگ نے موٹر سائیکل چھیننے کی کوشش کی، اس دوران تیز رفتار ٹریلر نے ایک ڈاکو کو کچل دیا جس کے نتیجے میں اس کی موت واقع ہوگئی۔

پولیس کے مطابق، ڈاکوؤں نے ایک موٹر سائیکل سوار کو روکنے کی کوشش کی لیکن موٹر سائیکل سوار نے مزاحمت کی، اس دوران ایک تیز رفتار ٹریلر موقع پر پہنچ گیا اور ایک ڈاکو کو کچل دیا۔ اس حادثے میں دیگر دو ڈاکو موقع سے فرار ہونے میں کامیاب ہوگئے۔

واقعے کی اطلاع ملتے ہی پولیس موقع پر پہنچ گئی اور علاقے کو گھیرے میں لے لیا۔ پولیس نے لاش کو قبضے میں لے کر ہسپتال منتقل کر دیا ہے۔ ابھی تک ہلاک ہونے والے ڈاکو کی شناخت نہیں ہو سکی۔ پولیس نے مزید تفتیش شروع کر دی ہے۔