سیالکوٹ: اے ٹی ایم سے رقم نکالنے والے شہریوں پر ڈاکوؤں نے ڈاکہ ڈالا، ایک ڈاکو ہلاک

سیالکوٹ،باغی ٹی وی (بیوروچیف شاہدریاض) تھانہ کوتوالی کے علاقے پیرس روڈ پر واقع ایک اے ٹی ایم سے رقم نکالنے والے تین شہریوں پر دو مسلح ڈاکوؤں نے ڈاکہ ڈال دیا۔ اس دوران ایک ڈاکو کو شہریوں نے پکڑ لیا اور اسے چھڑانے کے لیے اس کے ساتھی نے فائرنگ کی جس میں وہ خود زخمی ہو گیا اور بعد میں ہسپتال میں دم توڑ گیا۔

تفصیلات کے مطابق، رانا عمر، عبداللہ نعیم اور بلال نامی تین شہری اے ٹی ایم سے رقم نکال رہے تھے کہ اسی دوران دو مسلح ڈاکوؤں نے انہیں گھیر لیا اور ان سے نقدی اور موبائل فونز چھین لیے۔ واردات کے بعد جب ڈاکو فرار ہونے لگے تو رانا عمر نے ایک ڈاکو کو پکڑ لیا۔ اس دوران دوسرے ڈاکو نے فائرنگ کر دی جس سے شہری گھبرا گئے۔ پکڑے ہوئے ڈاکو نے شہری کے بازوؤں پر دانتوں سے کاٹا اور اپنے ساتھی سے کہا کہ اسے فائر مار دے۔ دوسرے ڈاکو نے شہری پر فائرنگ کی جس سے پکڑا ہوا ڈاکو زخمی ہو گیا۔

پولیس نے موقع پر پہنچ کر زخمیوں کو ہسپتال پہنچایا جہاں زخمی ڈاکو نے دم توڑ دیا۔ ہلاک ہونے والے ڈاکو کی شناخت علی رضا ولد محمد وارث کے طور پر ہوئی جو مختلف مقدمات میں مطلوب تھا۔ پولیس نے مقدمہ درج کر لیا ہے اور فرار ہونے والے ڈاکو کی گرفتاری کے لیے ٹیمیں تشکیل دے دی ہیں۔