جنوبی افریقا ویمنز نے پہلے ٹی 20 میں پاکستان کو 10 رنز سے شکست دے دی

ملتان: جنوبی افریقا ویمنز کرکٹ ٹیم نے تین میچوں پر مشتمل ٹی 20 سیریز کے پہلے میچ میں پاکستان کو 10 رنز سے شکست دے دی۔ ملتان میں کھیلے گئے میچ میں پاکستان ویمنز ٹیم کی کپتان فاطمہ ثناء نے ٹاس جیت کر مہمان ٹیم کو پہلے بیٹنگ کی دعوت دی۔ جنوبی افریقا ویمنز نے پہلے بیٹنگ کرتے ہوئے مقررہ 20 اوورز میں 4 وکٹوں کے نقصان پر 132 رنز بنائے۔ جنوبی افریقا کی تزمین برٹس 56 رنز بنا کر نمایاں رہیں، جبکہ سن لوس نے 27، ماریزان کپ نے 14 اور چلو ٹریون نے 15 رنز بنائے۔ پاکستان کی جانب سے سعدیہ اقبال نے بہترین بولنگ کا مظاہرہ کرتے ہوئے 3 وکٹیں حاصل کیں، جبکہ ندا ڈار کے حصے میں ایک وکٹ آئی۔

پاکستانی ٹیم 133 رنز کے ہدف کا تعاقب کرتے ہوئے مقررہ 20 اوورز میں 5 وکٹوں کے نقصان پر 122 رنز ہی بنا سکی۔ عالیہ ریاض نے 52 اور کپتان فاطمہ ثناء نے 37 رنز کی اننگز کھیلی، لیکن ٹیم کو فتح دلانے میں ناکام رہیں۔ جنوبی افریقا کی جانب سے ماریزان کپ اور تمی سکھونے نے 2، 2 وکٹیں حاصل کیں جبکہ سیشنی نائیڈو نے ایک وکٹ حاصل کی۔ تین میچوں کی سیریز کے بقیہ دو میچز 18 اور 20 ستمبر کو ملتان میں کھیلے جائیں گے۔