عوامی نیشنل پارٹی نے آئینی عہدوں کی مدت ملازمت میں توسیع کی مخالفت کا فیصلہ کرلیا

پشاور: عوامی نیشنل پارٹی (اے این پی) نے آئینی عہدوں کی مدت ملازمت میں توسیع کی مخالفت کا اعلان کرتے ہوئے کہا ہے کہ ایسی کوئی بھی آئینی ترمیم جو شخصی آزادی اور جمہوری اصولوں کے خلاف ہو، اس کی بھرپور مخالفت کی جائے گی۔ پشاور میں پارٹی صدر ایمل ولی خان کی زیر صدارت مرکزی مشاورتی کمیٹی کا اجلاس ہوا، جس میں موجودہ سیاسی صورتحال اور دیگر اہم امور پر تفصیلی بحث کی گئی۔ اجلاس کے بعد جاری کیے گئے اعلامیے میں کہا گیا کہ پارٹی خیبر پختونخوا کے نام کو صرف "پختونخوا” میں تبدیل کرنے کی تجویز پر بھی غور کر رہی ہے۔
اعلامیے کے مطابق عوامی نیشنل پارٹی سیاسی کارکنان کے فوجی عدالتوں میں ٹرائل کی تجویز کو بھی مسترد کرتی ہے اور وفاقی آئینی عدالت کے قیام کا خیر مقدم کرتی ہے، جسے عدالتی اصلاحات کے لیے ضروری قرار دیا گیا ہے۔ پارٹی نے اس بات پر زور دیا کہ پارلیمان کی بالادستی کے لیے عدالتی اصلاحات وقت کی اہم ضرورت ہیں۔
اے این پی نے یہ بھی واضح کیا کہ وہ وفاقیت اور صوبائی خودمختاری کے خلاف کسی بھی ترمیم کی بھرپور مخالفت کرے گی، بالخصوص ایسی ترامیم جو اٹھارھویں آئینی ترمیم کے لیے نقصان دہ ثابت ہو سکتی ہیں۔مزید یہ کہ پارٹی آئینی ترامیم کی حمایت کرے گی، بشرطیکہ وہ 1973 کے آئین سے متصادم نہ ہوں اور جمہوری اصولوں کے مطابق ہوں۔