ڈاکٹر ذاکر نائیک کا دورہ پاکستان , شیخ فارق نائیک بھی ساتھ ہوں گے

باغی ٹی وی رپورٹ: معروف مذہبی اسکالر ڈاکٹر ذاکر نائیک نے شیخ فارق نائیک کے ہمراہ رواں سال پاکستان کا دورہ کرنے کا اعلان کر دیا ہے۔ یہ اعلان سماجی رابطوں کی ویب سائٹ "ایکس” پر ڈاکٹر ذاکر نائیک کے آفیشل اکاؤنٹ سے کیا گیا۔

پوسٹ کے مطابق ڈاکٹر ذاکر نائیک اور شیخ فارق نائیک کو حکومتِ پاکستان کی جانب سے دعوت دی گئی ہے، جس پر وہ کراچی، لاہور، اور اسلام آباد میں عوامی اجتماعات سے خطاب کریں گے۔

جاری کردہ شیڈول کے مطابق ڈاکٹر ذاکر نائیک 5 اور 6 اکتوبر کو کراچی، 12 اور 13 اکتوبر کو لاہور جبکہ 19 اور 20 اکتوبر کو اسلام آباد میں خطاب کریں گے۔ ان کے خطابات مذہبی ٹی وی چینل "پیس ٹی وی” پر براہ راست نشر کیے جائیں گے۔

یاد رہے کہ ڈاکٹر ذاکر نائیک نے اس سے قبل پاکستانی یوٹیوبر نادر علی کے پوڈکاسٹ میں پاکستان کا دورہ کرنے کی خواہش ظاہر کی تھی۔ انہوں نے بتایا کہ 2020 میں ان کا پاکستان آنے کا ارادہ تھا لیکن کورونا وباء کی وجہ سے یہ دورہ ملتوی کرنا پڑا۔ اب وہ دوبارہ پاکستان کے دورے کی منصوبہ بندی کر رہے ہیں۔