ملک بھر میں بارشیں،NDMA کا الرٹ جاری

اسلام آباد(باغی ٹی وی رپورٹ) نیشنل ڈیزاسٹر منیجمنٹ اتھارٹی (این ڈی ایم اے) نے ایک بار پھر ملک بھر میں متوقع بارشوں کے حوالے سے ہنگامی الرٹ جاری کر دیا ہے۔ محکمہ موسمیات کے مطابق 26 ستمبر سے یکم اکتوبر تک ملک کے کئی علاقوں میں شدید بارشوں کا امکان ہے جس سے لینڈ سلائیڈنگ اور سیلابی صورتحال پیدا ہو سکتی ہے۔

تفصیلات کے مطابق پنجاب، خیبر پختونخوا، گلگت بلتستان اور آزاد کشمیر کے مختلف علاقوں میں گرج چمک کے ساتھ موسلادھار بارش متوقع ہے۔ اس کے علاوہ سندھ کے کچھ علاقوں میں 26 ستمبر سے 28 ستمبر تک وقفے وقفے سے بارش کا امکان ہے۔ ان بارشوں کی وجہ سے شہری علاقوں میں پانی جمع ہونے اور پہاڑی علاقوں میں لینڈ سلائیڈنگ جیسے واقعات پیش آ سکتے ہیں۔

این ڈی ایم اے نے خصوصی طور پر مری، گلیات، مانسہرہ، سوات، دیر، کوہستان، چترال، شانگلہ، بونیر، کشمیر اور گلگت بلتستان کے پہاڑی علاقوں میں لینڈ سلائیڈنگ کے خدشات ظاہر کیے ہیں۔ اس حوالے سے تمام متعلقہ اداروں کو ہدایات جاری کی گئی ہیں کہ وہ کسی بھی ممکنہ ہنگامی صورتحال کے لیے مکمل تیار رہیں اور ایمرجنسی رسپانس ٹیموں کو متحرک رکھیں۔

این ڈی ایم اے نے مقامی انتظامیہ اور عوام کو بھی خبردار کرتے ہوئے کہا ہے کہ وہ موسم کی صورتحال پر نظر رکھیں اور پیشگی احتیاطی تدابیر اختیار کریں۔ عوام کو ہدایت کی گئی ہے کہ وہ غیر ضروری سفر سے گریز کریں، خصوصاً پہاڑی علاقوں میں، تاکہ کسی بھی ناخوشگوار صورتحال سے بچا جا سکے۔

مزید برآں، این ڈی ایم اے نے رابطہ سڑکوں کی ممکنہ بندش سے نمٹنے کے لیے ضروری مشینری اور وسائل کی دستیابی کو یقینی بنانے کی بھی ہدایت کی ہے تاکہ بروقت امدادی کارروائیاں ممکن ہو سکیں۔ عوام کو ہدایت کی گئی ہے کہ وہ ایڈوائزری اور الرٹس پر عمل کریں اور کسی بھی ہنگامی صورتحال کی صورت میں فوری طور پر متعلقہ حکام سے رابطہ کریں۔