عمران خان کا اسٹیبلشمنٹ سے مذاکرات کے حوالے سے پارٹی ترجمان کی رائے کی تردید

بانی پاکستان تحریک انصاف (پی ٹی آئی) عمران خان نے اسٹیبلشمنٹ سے مذاکرات کے حوالے سے اپنے مؤقف کو واضح کیا ہے کہ ان مذاکرات کا کوئی فائدہ نہیں ہے۔ اڈیالہ جیل میں توشہ خانہ ٹوکیس کی سماعت کے دوران صحافیوں نے عمران خان سے سوال کیا کہ پارٹی ترجمان رؤف حسن نے اسٹیبلشمنٹ سے مذاکرات کو پارٹی پالیسی قرار دیا ہے۔عمران خان نے اس سوال کے جواب میں کہا، "روف حسن کو غلط فہمی ہوئی ہے۔ اسٹیبلشمنٹ سے مذاکرات کا کوئی فائدہ نہیں۔” انہوں نے مزید کہا کہ وہ 8 ستمبر کے جلسے کے بعد واضح کرچکے ہیں کہ پی ٹی آئی کسی سے مذاکرات نہیں کرے گی۔
یہ بیان اس وقت سامنے آیا ہے جب دو روز قبل تحریک انصاف کے ترجمان رؤف حسن نے ایک انٹرویو میں کہا تھا کہ پارٹی اور اسٹیبلشمنٹ کے درمیان بات چیت ناگزیر ہے اور اس میں مزید تاخیر نہیں ہونی چاہیے۔ انہوں نے یہ بھی کہا کہ تحریک انصاف پہلے بھی بات چیت کے لیے تیار تھی اور آج بھی ہے۔دوسری جانب، عمران خان نے حالیہ بیانات میں کہا تھا کہ اسٹیبلشمنٹ سے بات چیت کے دروازے بند کر دیے گئے ہیں اور پارٹی کو ہدایت کردی گئی ہے کہ اب اسٹیبلشمنٹ سے کوئی بات نہ کرے۔ یہ تمام معاملات پی ٹی آئی کی مستقبل کی حکمت عملی کے حوالے سے اہمیت رکھتے ہیں۔