کے پی حکومت کو آئی ایم ایف کے ساتھ معاہدے کے کچھ نکات پر تحفظات

پشاور: خیبرپختونخوا حکومت نے عالمی مالیاتی ادارے (آئی ایم ایف) کے ساتھ طے پانے والے معاہدے کے کچھ نکات پر تحفظات کا اظہار کیا ہے۔

باغی ٹی وی: مشیر خزانہ خیبر پختونخوا مزمل اسلم نے نجی چینل سے گفتگو کرتے ہوئے بتایا کہ گزشتہ روز ہونے والے کابینہ اجلاس میں معاہدے کے بعض نکات پر سوالات اٹھائے گئے اور مزید وضاحت طلب کی گئی صوبائی کابینہ نے وفاقی حکومت کو ان تحفظات کی اطلاع دینے کی ہدایت کی ہے، اور وفاقی حکومت کی وضاحت وزیراعلیٰ خیبرپختونخوا کو پیش کی جائے گی خیبرپختونخوا کابینہ نے آئی ایم ایف پیکج کی منظوری کو خوش آئند قرار دیا ہے، تاہم کچھ نکات پر اپنے تحفظات کا اظہار کیا ہے۔

واضح رہے کہ دو روز پہلے آئی ایم ایف کے ایگزیکٹو بورڈ نے پاکستان کے لیے 7 ارب ڈالر قرض کی منظوری دی تھی آئی ایم ایف کی مینیجنگ ڈائریکٹر کرسٹینا جارجیوا نے پاکستانی حکومت اور عوام کو مبارکباد دیتے ہوئے کہا کہ پاکستان اپنے بنائے ہوئے معاشی اصلاحاتی پروگرام پر عمل کر رہا ہے، جس کے نتیجے میں ملک میں مہنگائی کی شرح میں کمی اور معیشت میں استحکام آ رہا ہے۔