گوجرہ: رقبے کا تنازع، ایک شخص قتل،متعدد زخمی

گوجرہ (باغی ٹی وی،نامہ نگار عبدالرحمن جٹ) گوجرہ کے نواحی گاؤں چک نمبر 434 ج ب میں مخالفین نے تشدد کرتے ہوئے ایک شخص کو قتل کر دیا۔ تفصیلات کے مطابق، محمد بوٹا اپنے بھائی شبیر حسین، بیٹے سبطین اور بھتیجے ثقلین رضا کے ہمراہ اپنے زرعی رقبے میں موجود تھا کہ اس دوران قیصر نوید اور شاہ نواز وہاں پہنچے اور عبد الستار کے ایماء پر حملہ کر دیا۔

حملہ آوروں نے شبیر حسین پر شدید تشدد کیا جس کے نتیجے میں وہ موقع پر ہی جاں بحق ہو گیا، جبکہ محمد بوٹا اور اس کے دیگر ساتھی زخمی ہوئے۔ ملزمان تشدد کے بعد موقع سے فرار ہو گئے۔ پولیس نے مقتول شبیر حسین کی لاش تحویل میں لے کر گورنمنٹ آئی کم جنرل ہسپتال گوجرہ منتقل کر دی ہے۔

واقعے کی وجہ عناد زرعی رقبے کا تنازعہ بتایا جا رہا ہے۔ مقتول اور اس کے بھائی محمد بوٹا نے اپنے زرعی رقبے کا علیحدہ نکا منظور کرایا تھا، جسے ملزمان قیصر نوید اور شاہ نواز نے قبول نہیں کیا اور اسی بنا پر یہ افسوسناک واقعہ پیش آیا۔

محمد بوٹا کی درخواست پر صدر پولیس گوجرہ نے مقدمہ درج کر لیا ہے اور ملزمان کی گرفتاری کے لیے کارروائی جاری ہے۔