تل ابیب: اسرائیلی فوج نے ایران میں مختلف فوجی اہداف پر فضائی حملوں کے آپریشن کی تکمیل کا اعلان کر دیا۔
باغی ٹی وی : اسرائیلی فوج کے بیان کے مطابق گھنٹوں جاری رہنے والے آپریشن کے بعد اسرائیلی جنگی طیارے بحفاظت اپنی ائیر بیسز پر واپس پہنچ گئے ہیں،ایران میں تقریبا 20 اہداف کو نشانہ بنایا گیا جن میں میزائل تیار کرنے والی تنصیبات اور زمین سے فضا تک مار کرنے والے میزائلوں اور دیگر فضائی سسٹمز شامل تھے۔
دوسری جانب ایرانی فضائی دفاع نے اعلان کیا کہ اسرائیل کی جانب سے جنوب مغرب اور مغربی سرحدوں پر فوجی ٹھکانوں پر حملے کی کوشش ناکام بنا دی، ایران کی تسنیم نیوز ایجنسی کے مطابق ایک ایرانی ذرائع نے بتایا کہ ایران ‘متناسب’ جواب دینے کا حق محفوظ رکھتا ہے۔
سعودی عرب،پاکستان کے بعد عمان،قطر کی ایران پر اسرائیلی حملے کی مذمت
جبکہ اسرائیلی ذرائع کے مطابق تہران کے مغرب اور جنوب مغرب میں ان حملوں میں 100 سے زائد طیاروں اور ڈرونز نے حصہ لیا، جس میں بیلسٹک میزائل سائٹس اور فضائی دفاعی بیٹریوں سمیت تقریباً 20 اہداف کو نشانہ بنایا گیا، ایران پر حملے میں F-35 طیاروں نے بھی حصہ لیا۔
ادھر ایرانی افواج نے اسرائیلی حملوں میں اپنے فوجیوں کے جاں بحق ہونے کی تصدیق کردی ایرانی میڈیا کے مطابق فوج نے تصدیق کی ہےکہ ہفتے کی علی الصبح اسرائیل نے عسکری سائٹس کو نشانہ بنایا جس کے نتیجے میں دو ایرانی فوجی جاں بحق ہوئے ہیں۔
اسرائیلی حملوں کے چند گھنٹے بعد ایرانی فوج کی جانب سے مختصر بیان جاری کیا گیا جس میں کہا گیا ہے کہ اسرائیل کے حملوں کے بعد اپنی سرزمین کا دفاع کرنے والے 4 فوجی اہلکار جاں بحق ہوگئے۔