ڈیرہ غازی خان: الفلاح فاؤنڈیشن کے زیر اہتمام فری میڈیکل کیمپ
ڈیرہ غازی خان (باغی ٹی وی ، سٹی رپورٹر جواد اکبر) الفلاح فاؤنڈیشن کے زیر اہتمام سینئر ڈاکٹر پروفیسر نوید آصف یوسفی کی سربراہی میں فری میڈیکل کیمپ کا انعقاد کیا گیا، جہاں مریضوں کے لیے مفت علاج اور ادویات فراہم کی گئیں۔ شہر اور مضافاتی علاقوں جیسے لوہار والا اور پائیگاہ سے بڑی تعداد میں مریضوں نے کیمپ میں شرکت کی۔
میڈیکل کیمپ میں مختلف شعبوں کے ماہرین نے اپنی خدمات پیش کیں۔ آنکھوں کے امراض کے لیے آئی اسپیشلسٹ موجود تھے جبکہ جنرل فزیشن نے عمومی بیماریوں کے مریضوں کا معائنہ کیا۔ جلد کے مسائل سے متاثرہ مریضوں کے لیے جلد اسپیشلسٹ ڈاکٹرمیاں محموداحمد موجود رہے اور مریضوں کو چیک کیا
تشخیصی سہولیات کے تحت 60 مریضوں کے لیب ٹیسٹ اور 40 مریضوں کے الٹراساؤنڈ کیے گئے۔ تمام مریضوں کو علاج کے ساتھ ساتھ مفت ادویات بھی فراہم کی گئیں۔
ڈاکٹر نوید آصف یوسفی کے ہمراہ ان کے ساتھیوں نے روحانی کاؤنٹر بھی قائم کیا، جہاں روحانی مسائل کا حل پیش کیا گیا اور مریضوں میں آگاہی کے لیے پمفلٹ تقسیم کیے گئے۔
کیمپ میں شرکت کرنے والے افراد نے مفت علاج اور ادویات کی فراہمی پر اطمینان کا اظہار کیا جبکہ روحانی معاونت کو بھی سراہا۔ ایسے اقدامات کا مقصد صحت عامہ کے فروغ کے ساتھ ضرورت مندوں کو بہتر سہولیات فراہم کرنا ہے جو کہ شہر اور گرد و نواح کے عوام کے لیے ایک اہم خدمت ثابت ہوئی۔
