کراچی میں چینی باشندوں پر حملہ: دفتر خارجہ کی جانب سے تحقیقات کا آغاز

کراچی: ترجمان دفتر خارجہ ممتاز زہرا بلوچ نے کراچی کے صنعتی علاقے سائٹ اے ایریا میں دو چینی باشندوں کے زخمی ہونے کے واقعے پر اپنی تشویش کا اظہار کیا ہے۔ انہوں نے کہا کہ واقعے کی تحقیقات جاری ہیں اور وزارت داخلہ اور چینی سفارتخانے کے ساتھ رابطے میں ہیں تاکہ ملوث افراد کو انصاف کے کٹہرے میں لایا جا سکے۔
ممتاز زہرا بلوچ نے ایک بیان میں کہا، "ہم زخمی چینی باشندوں کے خاندانوں سے اظہار ہمدردی کرتے ہیں اور ان کی صحتیابی کے لیے دعاگو ہیں۔ پاکستان ذمہ دار افراد کو انصاف کے کٹہرے میں لانے کے لیے پرعزم ہے۔”
انہوں نے اس بات پر زور دیا کہ پاکستان اور چین قریبی شراکت دار اور آہنی بھائی ہیں۔ اس کے ساتھ ہی، پاکستان چینی شہریوں، منصوبوں، اور اداروں کے تحفظ کے لیے اپنے غیر متزلزل عزم کا اعادہ کرتا ہے۔یہ واقعہ اس وقت پیش آیا جب کراچی کے صنعتی علاقے میں غیرملکیوں اور مقامی سیکیورٹی گارڈز کے درمیان جھگڑا ہوا، جس کے نتیجے میں دو چینی شہری زخمی ہو گئے۔ واقعے کے بعد، سندھ کے وزیرداخلہ نے تحقیقات کا حکم دیا تھا تاکہ اس واقعے کے پس پردہ وجوہات کا پتہ لگایا جا سکے اور آئندہ اس طرح کے واقعات سے بچنے کے لیے مؤثر اقدامات کیے جا سکیں۔پاکستانی حکومت نے چینی شہریوں کی حفاظت کو انتہائی اہمیت دی ہے اور ایسے واقعات کی روک تھام کے لیے سخت اقدامات کرنے کا عزم ظاہر کیا ہے۔ اس واقعے کی تحقیقاتی رپورٹ کے بعد، مزید قانونی کاروائیاں کی جائیں گی تاکہ ذمہ داروں کو جلد سے جلد قانون کے کٹہرے میں لایا جا سکے۔