لاہور: وزیراعلیٰ پنجاب مریم نواز نے امریکی صدارتی انتخابات میں ڈونلڈ ٹرمپ کی جیت پر انہیں مبارک باد پیش کی اور کہا کہ اس کامیابی سے پاکستان اور امریکا کے تعلقات میں بہتری کی توقع ہے۔ لاہور سے جاری ایک بیان میں مریم نواز نے ڈونلڈ ٹرمپ کو امریکا کے 47ویں صدر بننے پر مبارک باد دی اور انہیں مستقبل میں کامیابیاں حاصل کرنے کی دعا دی۔انہوں نے اپنے بیان میں کہا کہ ڈونلڈ ٹرمپ کا دوبارہ صدر منتخب ہونا خطے کے لیے ایک مثبت پیغام ہے، اور اس سے نہ صرف پاک امریکا تعلقات میں استحکام آئے گا بلکہ مختلف شعبوں میں تعاون کے نئے مواقع بھی پیدا ہوں گے۔ مریم نواز نے اس بات پر زور دیا کہ دونوں ممالک کے درمیان بہتر تعلقات سے خطے میں امن اور استحکام کو فروغ ملے گا اور باہمی تجارت سمیت مختلف شعبوں میں پیشرفت ممکن ہوگی۔امریکی صدارتی انتخابات میں ریپبلکن امیدوار ڈونلڈ ٹرمپ نے ڈیموکریٹ امیدوار کملا ہیرس کو شکست دے کر دوبارہ عہدہ صدارت حاصل کر لیا ہے۔ ڈونلڈ ٹرمپ نے کل 538 الیکٹورل ووٹوں میں سے 277 ووٹ حاصل کیے، جبکہ ان کی مخالف امیدوار کملا ہیرس 226 ووٹ حاصل کر سکیں۔ ڈونلڈ ٹرمپ کی جیت نے انہیں امریکا کا 47واں صدر بنا دیا ہے، جو دوسری بار اس عہدے پر فائز ہوئے ہیں۔
