رحیم یار خان: کچے میں پولیس آپریشن، 2 مغوی بازیاب، خطرناک ڈاکو ہلاک

رحیم یار خان(باغی ٹی وی رپورٹ) کچے میں پولیس آپریشن، 2 مغوی بازیاب، خطرناک ڈاکو ہلاک

تفصیل کے مطابق رحیم یار خان پولیس نے کچے کے علاقے میں ٹارگٹڈ آپریشن کے دوران دو ماہ سے مغوی دو شہریوں آصف اور بلال کو بازیاب کروا لیا جبکہ خطرناک ڈاکو نادر کوش کو ہلاک کر دیا۔ ترجمان پولیس کے مطابق دونوں مغویان کو 26 ستمبر کو ہنی ٹریپ کے ذریعے صادق آباد سے اغوا کیا گیا تھا، اور پولیس نے سرچ آپریشن کے دوران انہیں بازیاب کر لیا۔

ہلاک ڈاکو کی شناخت نادر کوش کے نام سے ہوئی جو اغوا برائے تاوان، پولیس پر حملے اور ڈکیتی کی وارداتوں میں ملوث تھا۔ نادر کوش پولیس کی طرف سے مطلوب تھا اور بھونگ میں پولیس کانسٹیبل اکبر گوپانگ کی شہادت اور سب انسپکٹر رانا رمضان پر حملے کا بھی مرکزی ملزم تھا۔

پولیس کے مطابق آپریشن سندھ کے موضع پکا چانڈیہ سے متصل سرحدی علاقے میں ڈاکوؤں کی موجودگی کی خفیہ اطلاعات پر کیا گیا۔ پولیس کے چھاپے کے دوران ڈاکوؤں نے فائرنگ کی، جس کے جواب میں پولیس کی کارروائی میں نادر کوش اپنے ساتھیوں کی فائرنگ سے ہلاک ہوگیا۔ اس کے ساتھی فصل کماد میں فرار ہونے میں کامیاب ہو گئے۔

پولیس نے دونوں مغویان آصف اور بلال کو کماد کے کھیت سے محبوس حالت میں بازیاب کیا، جہاں ڈاکوؤں نے انہیں ہاتھ پاؤں باندھ کر رکھا تھا۔ اس کامیاب آپریشن میں ڈی ایس پی بھونگ کی نگرانی میں پولیس کی بھاری نفری نے حصہ لیا۔

آئی جی پنجاب ڈاکٹر عثمان انور نے اس کامیاب کارروائی پر ڈی پی او رضوان عمر گوندل اور پولیس ٹیم کو شاباش دیتے ہوئے کہا کہ کچے میں عوام کی جان و مال کی حفاظت کے لیے ٹارگٹڈ آپریشنز کا سلسلہ جاری رکھا جائے گا۔