ننکانہ صاحب (باغی ٹی وی، نامہ نگار احسان اللہ ایاز) ریسکیور فاطمہ بانو کی شہادت، نماز جنازہ میں افسران و شہریوں کی شرکت
گزشتہ روز کشمیر روڈ پر حادثے کا شکار ہونے والی ریسکیو 1122 کی "ایمرجنسی میڈیکل ٹیکنیشن” فاطمہ بانو فیصل آباد کے الائیڈ ہسپتال میں زخموں کی تاب نہ لاتے ہوئے اپنے خالق حقیقی سے جا ملی۔
آج دھولر چوک قبرستان میں ان کی نماز جنازہ ادا کی گئی، جس میں ڈپٹی کمشنر محمد تسلیم اختر راؤ، ڈسٹرکٹ ایمرجنسی آفیسر محمد اکرم پنوار، دیگر افسران، میڈیا نمائندگان، ریسکیورز، اور شہریوں کی بڑی تعداد نے شرکت کی۔ ریسکیو 1122 کے چاق و چوبند دستے نے مرحومہ کو سلامی پیش کی۔
سیکرٹری ایمرجنسی سروسز ڈاکٹر رضوان نصیر اور دیگر افسران نے قبر پر پھول چڑھائے اور مرحومہ کی خدمات کو سراہا۔ ڈسٹرکٹ ایمرجنسی آفیسر محمد اکرم پنوار نے کہا کہ فاطمہ بانو ایک پیشہ ور اور خدمتِ انسانیت کے جذبے سے سرشار ریسکیور تھیں، ان کا کردار ہمیشہ یاد رکھا جائے گا۔
سوگوار خاندان کے ساتھ تعزیت کرتے ہوئے انہوں نے مرحومہ کے درجات کی بلندی کے لیے دعا کی۔
