اوچ شریف (نامہ نگارحبیب خان) محکمہ آثار قدیمہ نے مذہبی سیاحت کے فروغ اور عالمی ثقافتی ورثے کے تحفظ کے لیے اہم قدم اٹھاتے ہوئے اوچ شریف کے تاریخی مقبروں اور مزارات کی تزئین و آرائش کے لیے 31 ملین روپے سے زائد فنڈز کی منظوری دے دی۔
تفصیلات کے مطابق ان فنڈز کے تحت مقبرہ بی بی جیوندیؒ کی بحالی کے لیے ایک کروڑ روپے، مقبرہ حضرت ابوحنیفہؒ کے لیے 62 لاکھ 82 ہزار روپے، جب کہ حضرت سید جلال الدین سرخپوش بخاریؒ اور حضرت سید غوث بندگیؒ کے مزارات کے لیے مجموعی طور پر ڈیڑھ کروڑ روپے مختص کیے گئے ہیں۔
یہ منصوبہ نہ صرف ان عالمی شہرت یافتہ مقامات کی حفاظت میں مددگار ثابت ہوگا بلکہ مذہبی سیاحت کے فروغ اور مقامی معیشت کو بھی تقویت دے گا۔ عوامی حلقوں نے اس اقدام کو ثقافتی ورثے کے تحفظ کی جانب اہم پیش رفت قرار دیا ہے۔
