لاہور (اعجازالحق عثمانی سے) لائیو اسٹاک ایمپلائز ایسوسی ایشن پنجاب کے انتخابات کا انعقاد لاہور کے ویٹرنری ہسپتال ہربنس پورہ میں کیا گیا۔
انتخابی عمل کے دوران پولنگ کے لیے خصوصی انتظامات کیے گئے، جن میں ایسوسی ایشن کے ارکان نے بھرپور شرکت کی۔انتخابی نتائج کے مطابق، شاہین گروپ پینل نے میدان مار لیا۔ سردار مقبول حسین ڈوگر نے صوبائی صدر کے عہدے پر کامیابی حاصل کی، جبکہ ملک انوارالحق اعوان نے صوبائی جنرل سیکرٹری کے عہدے پر کامیابی حاصل کی۔ دونوں امیدواروں نے 19 ووٹ حاصل کیے، جس کے بعد ان کا پینل اپنے مخالفین سے ایک قدم آگے رہا۔
دوسری جانب، الخدمت گروپ پینل کے امیدوار غلام حیدر خان نیازی اور ساجد رمضان چوہدری 17 ووٹ حاصل کر کے کامیابی سے ہمکنار نہ ہو سکے۔
انتخابات کے دوران ایسوسی ایشن کے ممبران میں جوش و خروش نمایاں تھا، اور پولنگ کا عمل خوشگوار ماحول میں مکمل ہوا۔ ووٹنگ کا عمل شفاف اور منصفانہ انداز میں جاری رہا جس نے تمام شرکاء کو مطمئن کیا۔نومنتخب صدر پنجاب سردار مقبول حسین ڈوگر اور جنرل سیکرٹری پنجاب ملک انوارالحق اعوان نے اپنے حامیوں کا شکریہ ادا کرتے ہوئے کہا کہ وہ لائیو اسٹاک ایمپلائز کے حقوق کے تحفظ اور ان کے مسائل کے حل کے لیے بھرپور کردار ادا کریں گے۔ انہوں نے کہا کہ ان کی اولین ترجیح ایسوسی ایشن کے ارکان کی فلاح و بہبود ہوگی اور وہ اپنے وعدوں کو پورا کرنے کے لیے ہر ممکن کوشش کریں گے۔
نئے عہدیداروں کی کامیابی کے بعد، لائیو اسٹاک ایمپلائز ایسوسی ایشن پنجاب کے مستقبل کے حوالے سے امیدیں روشن ہو گئی ہیں، اور توقع کی جارہی ہے کہ یہ انتخابی کامیابی ایسوسی ایشن کی ترقی اور بہتری کے لیے ایک اہم سنگ میل ثابت ہوگی۔
شیر افضل مروت نے پارٹی پالیسی کے خلاف کوئی بات نہیں کی،بیرسٹر گوہر
