سیالکوٹ،باغی ٹی وی( بیوروچیف شاہد ریاض)وزیر اعلیٰ پنجاب کی ہدایت پر ڈپٹی کمشنر سیالکوٹ محمد ذوالقرنین لنگڑیال کی زیر صدارت ریسٹ ہاؤس پٹواریاں کے ہال میں ریونیو عوامی خدمت سروسز کورٹ کا انعقاد کیا گیا۔ اس اجلاس میں اسسٹنٹ کمشنر سیالکوٹ انعم بابر، اے سی یو ٹی، تحصیلدار مشتاق راں، نائب تحصیلدار ان سمیت ریونیو افسران نے شرکت کی۔
ڈپٹی کمشنر محمد ذوالقرنین لنگڑیال نے محکمہ مال کے مقامی حکام کو ہدایت کی کہ وہ وزیر اعلیٰ پنجاب مریم نواز شریف کی ہدایت کے مطابق ہر ماہ کے پہلے دو ورکنگ ڈیز میں صبح 11 سے دوپہر 2 بجے تک چاروں تحصیل ہیڈکوارٹرز میں ریونیو عوامی خدمت کورٹ کا انعقاد کریں گے، جہاں اسسٹنٹ کمشنر سمیت تمام ریونیو افسران اور عملہ شریک ہوں گے۔
انہوں نے کہا کہ ریونیو کورٹ کا مقصد شہریوں کی محکمہ مال کے متعلقہ شکایات کی سماعت اور ان کے فوری حل کے لیے اقدامات کرنا ہے۔ انہوں نے مزید کہا کہ ریونیو کورٹ میں عوامی شکایات کو رجسٹرڈ کیا جائے گا اور ان کے حل کے لیے کیے جانے والے اقدامات کے بارے میں اسی روز سینیئر ممبر بورڈ آف ریونیو کو بھجوائے جائیں گے۔
ڈپٹی کمشنر محمد ذوالقرنین لنگڑیال نے ریونیو عوامی خدمت سروسز کورٹ میں سائلین کے مسائل سنے اور ان کے حل کے لیے احکامات صادر کیے۔ بعد ازاں ڈپٹی کمشنر نے اسپیشل پرائس مجسٹریٹس اور محکمہ ہیلتھ کے مقامی حکام کے اجلاس سے خطاب کیا اور وزیر اعلیٰ پنجاب کی جانب سے کارکردگی ماپنے کے لیے جاری کیے گئے ‘پرفارمنس انڈیکیٹرز’ کا جائزہ لیا۔
