باغی ٹی وی، ہمارا محسن

باغی ٹی وی، ہمارا محسن
تحریر: حیدر علی صدیقی
haidersiddiqui276@gmail.com
سب سے پہلے تو باغی ٹی وی کے سی ای او اور میدانِ صحافت کی نڈر شخصیت جناب مبشر لقمان صاحب کو سالگرہ مبارک۔ اللہ ﷻ ان کی عمر دراز فرمائے۔امن و استحکام، حقوقِ انسانی اور علم و ادب کے لیے کوشاں پاکستان کے سب سے بڑے ڈیجیٹل نیٹ ورک باغی ٹی وی کو اپنی بہترین خدمات کے ساتھ 13 ویں سالگرہ مبارک۔

باغی ٹی وی کے ساتھ میرا رشتہ اگست 2021ء میں ایکس (سابقہ ٹوئٹر) کے راستے سے قائم ہوا، جب باغی ٹی وی پر میرا پہلا کالم 9 اگست 2021ء کو شائع ہوا۔ تب سے میں اس فورم کے ساتھ جڑ گیا۔ بعد ازاں باغی ٹی وی کے پلیٹ فارم سے میرے کئی کالم شائع ہوتے رہے ہیں۔ میں دیگر باتوں کو ایک طرف رکھتے ہوئے آج باغی ٹی وی کے حوالے سے بات کروں گا۔

باغی ٹی وی پاکستان کا سب سے بڑا اور ملک گیر ڈیجیٹل نیٹ ورک ہے لیکن بایں ہمہ یہ پاکستان کے ہر ایک شہری کی توانا آواز ہے۔ امن و استحکام، حالاتِ حاضرہ، سائنس و ٹیکنالوجی، علم و ادب، جمہوریت و سیاست، ملکی و بین الاقوامی خبریں جیسے کثیر موضوعات باغی ٹی وی کا حصہ ہیں۔ باغی ٹی وی کی نشریات کئی زبانوں میں ہیں، جن میں اردو، پشتو، انگریزی، دری اور چینی شامل ہیں۔

یہ پلیٹ فارم لکھاریوں کے لیے کتنا زبردست اور بہترین ہے، اس کا اندازہ اس بات سے لگائیں کہ آج کل نو آموز قلمکاروں اور لکھاریوں کے لیے کسی جریدے یا ڈیجیٹل پلیٹ فارم پر اپنے خیالات اور تخلیقات شیئر کرنے کا موقع نہیں ملتا، لیکن باغی ٹی وی اس حوالے سے سب سے الگ ہے۔ اس نے ہر ایک کا خیرمقدم کیا اور اس کی آواز کو بلند کیا۔

باغی ٹی وی نے نئے آنے والوں کو مایوس نہیں ہونے دیا بلکہ ان کو امید دلائی، ان کی حوصلہ افزائی کی، اور انہیں اپنے خیالات اور تخلیقات شیئر کرنے کا موقع فراہم کیا۔ یہ باتیں میں جذبات میں آ کر نہیں کہہ رہا بلکہ میں خود اس صورتحال سے گزر چکا ہوں۔ جب میرا پہلا کالم باغی ٹی وی پر شائع ہوا تھا تو اس وقت کی خوشی دیدنی تھی، جسے اب میں الفاظ میں بیان کرنے سے قاصر ہوں۔ باغی ٹی وی اور اس کی انتظامیہ کی یہی وسیع ظرفی تھی جس نے راقم کو حوصلہ دلایا۔ تب سے باغی ٹی وی اور اس کی انتظامیہ کو میں اپنے محسنوں میں شمار کرتا ہوں۔

باغی ٹی وی درست اور سچ مواد شریک کرنے کا ملک کا سب سے بڑا ڈیجیٹل اور عوامی پلیٹ فارم ہے۔ نو آموز قلمکار حضرات اپنی صحیح اور درست مواد عوام سے شیئر کرنے کے لیے باغی ٹی وی کا رخ کریں اور اپنی آواز کو توانا بنائیں۔

باغی ٹی وی کی بات چلی تو اس موقع پر باغی ٹی وی کے ایڈیٹر جناب ممتاز حیدر اعوان صاحب کے بارے میں کچھ نہ کہنا زیادتی اور نا انصافی ہوگی۔ ممتاز حیدر صاحب ایک ملک گیر فورم کے ایڈیٹر ہونے کے ساتھ ساتھ ایک سادہ، انسان دوست اور ملنسار انسان ہیں۔ ایک بڑے ڈیجیٹل نیٹ ورک کے ایڈیٹر ہونے کے ناطے آپ ان کی مصروفیات کو سمجھ سکتے ہیں، لیکن بایں ہمہ آپ بہترین اخلاق و صفات کے مالک انسان ہیں۔ ہماری نہ کبھی ملاقات ہوئی ہے، نہ ہمارے درمیان باغی ٹی وی کے علاوہ کوئی رشتہ ہے۔ لیکن ایک جونیئر کالم نگار ہونے کی حیثیت سے اگر باغی ٹی وی کے حوالے سے کوئی بات پیش آئی، کوئی سوال پیش آیا، تو ممتاز صاحب نے انتہائی محبت اور سنجیدگی کے ساتھ رہنمائی فرمائی۔

خیر! بات لمبی چوڑی ہوتی جا رہی ہے۔ اللہ کرے کہ باغی ٹی وی کی خدمات اور کامیابی کا یہ سفر تا دیر جاری و ساری رہے۔ آمین۔
سالگرہ مبارک باغی ٹی وی۔