مظفرآباد: آزاد کشمیر کا ایک نوجوان غلطی سے لائن آف کنٹرول عبور کرگیا
آزاد کشمیر کے علاقے تیتری نوٹ کا رہائشی نوجوان محمد یاسر فیض، جس کا ذہنی توازن درست نہیں، غلطی سے لائن آف کنٹرول (ایل او سی) عبور کرگیا۔ یاسر کا تعلق محلہ نوٹ سے ہے اور اسے دو روز قبل ذہنی علاج کے لیے راولاکوٹ لے جایا گیا تھا۔یاسر کے اہلخانہ کا کہنا ہے کہ وہ ذہنی طور پر پریشان ہے اور اس کی حالت بہتر بنانے کے لیے اسے طبی معائنے کی غرض سے راولاکوٹ منتقل کیا گیا تھا۔ اہل خانہ نے حکام سے اپیل کی ہے کہ ان کے بیٹے کی بحفاظت واپسی کے لیے فوری اقدامات کیے جائیں، کیونکہ یہ واقعہ محض ایک غلطی تھی۔
اس معاملے پر اعلیٰ حکام نے تحقیقات شروع کر دی ہیں اور نوجوان کی بازیابی کے لیے کوششیں جاری ہیں۔ اہلخانہ کا کہنا ہے کہ انہیں امید ہے کہ حکومتی ادارے جلد ہی ان کے بیٹے کو بحفاظت واپس لائیں گے۔
یاد رہے کہ لائن آف کنٹرول (ایل او سی) ایک حساس سرحد ہے اور اس پر کسی بھی قسم کی غیر مجاز نقل و حرکت سے سنگین نتائج کا سامنا ہو سکتا ہے، لیکن اس کیس میں یہ واضح ہے کہ نوجوان کی حرکت نادانستہ اور غیر ارادی تھی۔
