کندھ کوٹ،باغی ٹی وی (نامہ نگارمختیاراعوان) واپڈا سیپکو اور رینجرز کی مشترکہ کارروائی، 50 غیر قانونی کنکشن منقطع، 10 مقدمات درج
وفاقی حکومت کی ہدایت پر واپڈا سیپکو نے کندھ کوٹ کے مختلف علاقوں میں رینجرز کے ہمراہ بجلی چوروں کے خلاف بڑی کارروائی کی۔ ملک محلہ، ہیبت روڈ اور دیگر علاقوں میں جاری آپریشن کے دوران 50 سے زائد غیر قانونی کنڈا کنکشن منقطع کیے گئے جبکہ 10 افراد کے خلاف مقدمات درج کیے گئے۔
کارروائی میں واپڈا سیپکو کندھ کوٹ سب ڈویژن کے انجینئر شفقت علی لاشاری، ایس ڈی او خالد باجکانی، ایل ایس اصغر علی بجارانی، ایل ایس شرف الدین باجکانی اور دیگر اہلکاروں نے حصہ لیا۔
میڈیا سے گفتگو کرتے ہوئے انجینئر شفقت علی لاشاری نے کہا کہ سندھ کے دیگر شہروں کی طرح ضلع کشمور-کندھ کوٹ میں بھی حکومتی بلوں کی ریکوری اور غیر قانونی بجلی کنکشن کے خاتمے کے لیے آپریشن کا آغاز کر دیا گیا ہے۔ یہ کارروائی رینجرز کی مدد سے کی جا رہی ہے اور اسے دیگر اضلاع تک بھی بڑھایا جائے گا۔
آپریشن کے دوران سیپکو ملازمین محمد شعبان باجکانی، محمد علی باجکانی، مبارک علی باجکانی، مرتضیٰ باجکانی، اور سعید باجکانی نے رینجرز کے ساتھ مل کر غیر قانونی کنکشنز کاٹنے اور بجلی چوروں کے خلاف کارروائی میں اہم کردار ادا کیا۔
حکام نے واضح کیا کہ آپریشن کا مقصد بجلی چوری کے خاتمے اور حکومتی ریونیو کی وصولی کو یقینی بنانا ہے، اور اس مہم کو جاری رکھا جائے گا۔
