سیالکوٹ ،باغی ٹی وی(بیوروچیف) ڈپٹی ڈائریکٹر تحفظ ماحولیات ڈاکٹر محمد اویس کی زیرِ سربراہی ٹیموں نے سمبڑیال کی مین مارکیٹ میں اچانک چھاپے مار کر ممنوعہ پلاسٹک بیگز کے خلاف کارروائی کی۔ دورانِ کارروائی 711 کلوگرام وزنی غیر قانونی پولی تھین بیگز ضبط کر لیے گئے، جبکہ 75 مائیکرون سے کم موٹائی کے شاپنگ بیگز کے استعمال پر متعدد دکانداروں کو مجموعی طور پر 45 ہزار روپے جرمانہ کیا گیا۔
محکمہ تحفظ ماحولیات کے مطابق، یہ کریک ڈاؤن ماحولیاتی قوانین پر عمل درآمد یقینی بنانے اور ماحولیاتی آلودگی کم کرنے کے لیے جاری رہے گا۔ شہریوں اور دکانداروں کو متنبہ کیا گیا ہے کہ وہ ممنوعہ پولی تھین بیگز کے بجائے ماحول دوست بیگز کا استعمال کریں ورنہ سخت قانونی کارروائی عمل میں لائی جائے گی۔
