ٹھٹھہ ،باغی ٹی وی(بلاول سموں) صوبائی سیکریٹری برائے اوقاف، مذہبی امور، زکوات و عشر جاوید صبغت اللہ مہر نے کہا ہے کہ سندھ صوفی بزرگوں اور درویشوں کی سرزمین ہے، جنہوں نے ہمیشہ امن، محبت، پیار، رواداری، بھائی چارے اور اخوت کا درس دیا ہے۔ ان کی تعلیمات پر عمل کرنا ہم سب کا فرض ہے۔ انہوں نے مزید کہا کہ سندھ کے بزرگوں کی درگاہیں ہماری روحانیت کا قیمتی اثاثہ ہیں، جو لوگوں کو فیض و برکتوں کا ذریعہ فراہم کرتی ہیں۔
یہ بات انہوں نے سندھ کے عظیم صوفی بزرگ حضرت عبداللہ شاہ اصحابی کی مزار پر چادر چڑھانے کے بعد دعا کرتے ہوئے کہی۔ صوبائی سیکریٹری جاوید صبغت اللہ مہر کا کہنا تھا کہ درگاہوں پر آنے والے زائرین و عقیدتمندوں کو بہترین سہولتیں فراہم کرنا محکمہ اوقاف کی اولین ترجیحات میں شامل ہے۔ انہوں نے اس عزم کا اظہار کیا کہ درگاہوں کے تقدس کو ہر صورت برقرار رکھا جائے گا۔
اس موقع پر، انہوں نے حضرت عبداللہ شاہ اصحابی کی درگاہ کے احاطے میں بنائے گئے شیلٹرز کا معائنہ کیا اور زائرین کے لیے نئے مسافر خانہ اور کمروں کی تعمیر کے کام میں سست روی پر برہمی کا اظہار کیا۔ صوبائی سیکریٹری نے متعلقہ افسران کو ہدایت کی کہ مسافر خانہ اور کمروں کی تعمیر کے ساتھ ساتھ واش رومز کی مرمت کے لیے فوری اقدامات کیے جائیں تاکہ زائرین کو بہتر سہولتیں فراہم کی جا سکیں۔
انہوں نے مزید کہا کہ حضرت عبداللہ شاہ اصحابی کے سالانہ عرس مبارک کے موقع پر (جو 12 تا 14 فروری 2025ء تک جاری رہے گا) دربار کے اطراف کی مکمل مانیٹرنگ کے لیے سی سی ٹی وی کنٹرول روم کے قیام، واک تھرو گیٹس کی تنصیب، پینے کے صاف پانی، وضوء، واش رومز، مسافر خانہ اور لنگر کے انتظامات کو مکمل طور پر یقینی بنایا جائے تاکہ زائرین کو کسی بھی قسم کی پریشانی کا سامنا نہ ہو۔
اس کے بعد، صوبائی سیکریٹری جاوید صبغت اللہ مہر نے مخدوم محمد ہاشم ٹھٹھوی لائبریری مکلی کا بھی دورہ کیا اور اس کی مرمت اور تزئین و آرائش کے کام کا جائزہ لیا۔ انہوں نے چیف ایڈمنسٹریٹر اوقاف کو ہدایت کی کہ لائبریری کے کام کو جلد از جلد مکمل کیا جائے تاکہ اس کو فعال اور مفید بنایا جا سکے۔
