پشاور: گورنر خیبرپختونخوا فیصل کریم کنڈی نے ایک تقریب سے خطاب کرتے ہوئے کہا کہ امن اور مذہب قوموں کی تعمیر میں اہم کردار ادا کرتے ہیں، اور ان دونوں کی مضبوط بنیاد پر ہی معاشرتی ترقی کی راہ ہموار کی جا سکتی ہے۔ انہوں نے مزید کہا کہ چیلنجز کا مقابلہ کرنے کے لیے ہمیں روایتی تعلیم سے ہٹ کر آگے بڑھنا ہوگا۔
فیصل کریم کنڈی نے خیبرپختونخوا میں تعلیمی نظام کی موجودہ صورتحال پر تشویش کا اظہار کرتے ہوئے کہا کہ صوبے میں بنیادی تعلیم کا نظام انتہائی دگرگوں ہے۔ ان کا کہنا تھا کہ خیبرپختونخوا میں تعلیمی نصاب اور سہولتوں کی فراہمی پر کوئی توجہ نہیں دی جا رہی، جس کے باعث بہت سے بچے سکولوں سے باہر ہیں۔گورنر نے اس بات پر زور دیا کہ خیبرپختونخوا کو پرامن اور خوشحال بنانے کے لیے نظام تعلیم کو جدید خطوط پر استوار کرنا ہوگا تاکہ تمام بچوں کو یکساں تعلیم کی فراہمی ممکن ہو سکے۔
فیصل کریم کنڈی نے تعلیم کے فروغ میں نجی شعبے کے تعلیمی اداروں کے اہم کردار کو سراہتے ہوئے کہا کہ ان اداروں نے تعلیم کے معیار کو بہتر بنانے میں اہم خدمات انجام دی ہیں اور ان کی شراکت داری سے ہی ہم اپنی تعلیمی نظام میں اصلاحات لا سکتے ہیں۔انہوں نے حکومت سے مطالبہ کیا کہ تعلیم کے شعبے میں مزید سرمایہ کاری کی جائے اور تعلیمی اداروں کو جدید وسائل فراہم کیے جائیں تاکہ آنے والی نسل کو بہتر مواقع مل سکیں۔
