حافظ آباد ،باغی ٹی وی (خبرنگارشمائلہ) ریل بازار سیل، تاجروں کا احتجاج، رمضان میں کاروبار ٹھپ
حافظ آباد میں میونسپل کمیٹی نے ریل بازار کو سیل کر دیا ہے، جس سے تاجروں میں شدید غم و غصہ پایا جاتا ہے۔ تاجروں کا کہنا ہے کہ میونسپل کمیٹی نے انہیں وارننگ دیے بغیر دکانوں کے آگے چھپر نہ لگانے اور شٹر رنگ نہ کرنے پر ان کی دکانیں سیل کر دی ہیں۔
ریل بازار کے دکانداروں نے اس اقدام کو ظلم قرار دیتے ہوئے کہا ہے کہ پہلے ان کے چھپر اتار لیے گئے اور اب دکانیں سیل کر دی گئی ہیں۔ ان کا کہنا ہے کہ اس سے ان کا کاروبار مکمل طور پر ٹھپ ہو گیا ہے اور رمضان المبارک میں ان کے بچوں کا رزق خطرے میں پڑ گیا ہے۔
ریل بازار اور انجمن تاجران نے اعلیٰ حکام سے اپیل کی ہے کہ وہ میونسپل کمیٹی کی اس غیر قانونی کارروائی کا نوٹس لیں اور انہیں فوری طور پر ریلیف فراہم کریں۔ تاجروں نے مطالبہ کیا ہے کہ انہیں چھپر بنانے کے لیے مناسب وقت دیا جائے تاکہ وہ اپنا کاروبار دوبارہ شروع کر سکیں۔
اس حوالے سے میونسپل کمیٹی کے حکام سے رابطہ کرنے کی کوشش کی گئی، تاہم ان کا مؤقف معلوم نہیں ہو سکا۔
اس واقعے پر شہریوں کی جانب سے بھی شدید ردعمل سامنے آیا ہے۔ شہریوں کا کہنا ہے کہ رمضان المبارک میں تاجروں کے ساتھ اس طرح کا سلوک ناانصافی ہے۔ انہوں نے مطالبہ کیا ہے کہ حکومت فوری طور پر اس معاملے کا نوٹس لے اور تاجروں کو انصاف فراہم کرے۔
