پاکستان میں ایف آئی اے لاہور سائبر کرائم رپورٹنگ سینٹر نے دو اہم مقدمات درج کیے ہیں جو کہ سوشل میڈیا پر فوجی قیادت، قومی اداروں اور اہم ملکی شخصیات کے خلاف نفرت انگیز اور غیرمناسب مواد کی تشہیر کرنے پر ہیں۔ ان افراد پر الزام ہے کہ انہوں نے سوشل میڈیا پلیٹ فارمز پر قومی اداروں اور شخصیات کے بارے میں انتہائی اشتعال انگیز پوسٹس کیں، جس کے نتیجے میں عوامی سطح پر بد اعتمادی اور نفاق کا ماحول پیدا ہوا۔
مقدمات میں شامل افراد میں شفیق الرحمان،احمد شاہد میاں،صابر شاکر،عادل راجہ،وقار ملک،ڈاکٹر شہباز گل،تحسین علی پنڈوٹا و دیگر شامل ہیں،یہ تمام افراد سوشل میڈیا پر سرگرم ہیں اور ان پر الزام ہے کہ انہوں نے مختلف سوشل میڈیا پلیٹ فارمز پر ملک کی فوج، اہم شخصیات، اور اداروں کے خلاف گمراہ کن اور اشتعال انگیز مواد شیئر کیا۔ اس مواد میں غیرمناسب زبان استعمال کی گئی اور عوام کو بہکایا گیا، جس کا مقصد قومی اداروں اور شخصیات کے خلاف نفرت پھیلانا تھا۔یہ الزامات سائبر کرائم ایکٹ 2016 کے تحت عائد کیے گئے ہیں، جو کہ انٹرنیٹ اور سوشل میڈیا پر ناپسندیدہ، نفرت انگیز یا جاہلانہ مواد کے پھیلاؤ کو روکنے کے لیے بنایا گیا تھا۔ ایف آئی اے کا کہنا ہے کہ ان افراد نے سوشل میڈیا پر بے بنیاد الزامات، ہتک آمیز مواد، اور دھمکیوں کے ذریعے معاشرتی ہم آہنگی کو نقصان پہنچانے کی کوشش کی۔
ایف آئی اے کی سائبر کرائم ٹیم نے ان افراد کے خلاف کارروائی کرتے ہوئے مختلف سوشل میڈیا پوسٹس اور مواد کا تجزیہ کیا۔ ان کی سوشل میڈیا پروفائلز اور دیگر آن لائن سرگرمیوں کا بغور جائزہ لیا گیا تاکہ ان کے خلاف مضبوط شواہد اکٹھا کیے جا سکیں۔ ایف آئی اے حکام کا کہنا ہے کہ یہ کارروائی پاکستان کے قومی مفاد، سیکیورٹی اداروں اور عوامی امن کو برقرار رکھنے کے لیے ضروری تھی۔
پاکستان کی حکومت اور سیکیورٹی اداروں کا یہ ماننا ہے کہ ایسے اقدامات اس لیے کیے جا رہے ہیں تاکہ سوشل میڈیا کو ایک ایسا ٹول نہ بننے دیا جائے جس کے ذریعے وطن عزیز میں سیاسی، سماجی، یا مذہبی انتشار پھیلایا جائے۔ سوشل میڈیا پر اس طرح کی نفرت انگیز اور اشتعال انگیز مہموں سے نہ صرف اداروں کی ساکھ کو نقصان پہنچتا ہے بلکہ اس سے قوم کے اتحاد کو بھی خطرہ لاحق ہوتا ہے۔
