سوشل میڈیا پر ہونے والے منفی پروپیگنڈے کے حوالے سے علیمہ خان کو ایک بار پھر جے آئی ٹی نے طلب کرلیا ہے۔ ذرائع کے مطابق، جے آئی ٹی نے علیمہ خان کو 14 مارچ 2025ء کو ذاتی حیثیت میں پیش ہونے کی ہدایت کی ہے۔
اس سے قبل 12 مارچ کو علیمہ خان کو جے آئی ٹی کے سامنے پیش ہونے کے لیے طلب کیا گیا تھا، لیکن وہ مقررہ تاریخ پر جے آئی ٹی میں پیش نہیں ہو سکیں۔ اس صورتحال نے تحقیقاتی اداروں کے سامنے نئے سوالات کھڑے کردیے ہیں۔ذرائع کا کہنا ہے کہ وفاقی حکومت کی جانب سے تشکیل دی گئی جے آئی ٹی کی سربراہی اسلام آباد پولیس کے آئی جی کر رہے ہیں۔ جے آئی ٹی کو الیکٹرانک جرائم کی روک تھام کے ایکٹ 2016ء کے سیکشن 30 کے تحت تشکیل دیا گیا ہے، جس کا مقصد سوشل میڈیا پر ہونے والی جعلی خبریں اور منفی پروپیگنڈے کی روک تھام کرنا ہے۔
ذرائع کے مطابق، جے آئی ٹی کے پاس اس معاملے کے حوالے سے مستند شواہد موجود ہیں، جن کی بنیاد پر تحقیقات کی جا رہی ہیں۔ اس معاملے کی مزید تفصیلات اور جے آئی ٹی کی کارروائی کے بارے میں آنے والے دنوں میں مزید معلومات فراہم کی جائیں گی۔
