ننکانہ صاحب،باغی ٹی وی(نامہ نگار احسان اللہ ایاز) بابا گورو نانک یونیورسٹی ننکانہ صاحب کے شعبہ ریاضی کے زیر اہتمام بابا گورو نانک ریاضیاتی سوسائٹی نے عالمی پائی دن کے موقع پر ایک معلوماتی سیمینار کا انعقاد کیا۔
سیمینار کا مقصد طلباء، اساتذہ اور ریاضی کے شوقین افراد کو پائی (π) کی اہمیت سے آگاہ کرنا تھا۔ سیمینار میں شعبہ ریاضی کے اساتذہ نے پائی کے تاریخی پس منظر، جیومیٹری، کیلکولس اور دیگر سائنسی شعبوں میں اس کے استعمال پر روشنی ڈالی۔
شعبہ ریاضی کے چیئرپرسن ڈاکٹر شاہد مبین نے پائی دن کی اہمیت پر زور دیتے ہوئے کہا کہ پائی صرف ایک عدد نہیں بلکہ ریاضی کی خوبصورتی اور اسرار کی علامت ہے۔ انہوں نے کہا کہ اس سیمینار سے شرکاء کو پائی کی اہمیت کو سمجھنے میں مدد ملے گی۔
سیمینار میں شرکاء نے مختلف موضوعات پر تبادلہ خیال کیا اور پائی کے مختلف سائنسی شعبوں میں استعمال کو دریافت کیا۔ اس تقریب سے شعبہ ریاضی کی جانب سے ریاضی کے علم کے لیے گہری محبت اور قدر دانی کا اظہار ہوا۔
