اپنی سلو موشن اور روبوٹک اسٹائل ڈانس ویڈیوز کے لیے مشہور 32 سالہ جنید خان کیرالہ کے ملاپورم میں ایک حادثے میں ہلاک ہو گئے۔
میڈیا رپورٹس کے مطابق، بھارتی وی لاگر کی موٹر سائیکل ایک ریت کے ٹیلے سے ٹکرا گئی جس کے نتیجے میں وہ شدید زخمی ہو گئے۔ وہ سر پر گہری چوٹ کے ساتھ سڑک کنارے بے ہوش پائے گئے اور فوری طور پر اسپتال منتقل کیے گئے، تاہم وہ زخموں کی تاب نہ لاتے ہوئے دم توڑ گئے۔یہ حادثہ جمعہ کی شام 6 بجکر 20 منٹ پر پیش آیا۔ ایک بس کے کارکن نے انہیں سڑک کنارے شدید زخمی حالت میں دیکھا اور متعلقہ حکام کو اطلاع دی۔
وی لاگر کی موت پر فلم ساز کمار سیدھرن نے اپنی سوشل میڈیا پوسٹ میں اس حادثے کو مشکوک قرار دیا اور سوال اٹھایا کہ آیا یہ واقعی ایک حادثہ تھا؟ انہوں نے کہا کہ یہ موت مشکوک حالات میں ہوئی ہے۔انہوں نے مزید کہا کہ جنید خان کچھ عرصے قبل جنسی زیادتی کے ایک مقدمے میں گرفتار ہوئے تھے اور اس کے بعد ان کے خلاف شدید نفرت انگیز مہم چلائی گئی تاکہ انہیں بدنام کیا جا سکے۔ ان کی موت ایک فطری حادثے سے زیادہ کسی اور حقیقت کی طرف اشارہ کرتی ہے۔
فلم ساز کے مطابق، حادثے کے وقت جنید خان جنسی زیادتی کے الزامات پر ضمانت پر تھے۔ ایک خاتون نے پولیس میں شکایت درج کروائی تھی کہ جنید خان نے ان سے شادی کا وعدہ کر کے ان سے تعلقات استوار کیے۔اس شکایت کی بنیاد پر کیرالہ پولیس نے دو ہفتے قبل انہیں بنگلورو سے گرفتار کیا تھا، جس کے بعد عوام میں ان کے خلاف شدید ردعمل دیکھنے میں آیا۔ ان کو شرمندہ کرنے کے لیے مختلف ویڈیوز اور پوسٹس بھی شیئر کی گئیں۔فلم ساز نے مزید کہا کہ "مجھے معلوم نہیں کہ یہ ایک حادثہ تھا یا قتل، لیکن بہرحال، لوگ سچائی جاننے کی کوشش نہیں کریں گے بلکہ اپنے اگلے ہدف کی طرف بڑھ جائیں گے۔”
