ننکانہ صاحب (نامہ نگاراحسان اللہ ایاز) ڈپٹی کمشنر محمد تسلیم اختر راؤ کی زیر صدارت ڈسٹرکٹ ایمرجنسی بورڈ اور ڈسٹرکٹ ڈیزاسٹر مینجمنٹ اتھارٹی کا اجلاس ڈی سی آفس کے کمیٹی روم میں منعقد ہوا۔
اجلاس میں ڈسٹرکٹ فوکل پرسن ایڈیشنل ڈپٹی کمشنر ریونیو رائے ذوالفقار علی، اسسٹنٹ کمشنرز، ڈسٹرکٹ ایمرجنسی آفیسر ریسکیو 1122 محمد اکرم پنوار، سی او ہیلتھ، سی او ایجوکیشن، لوکل گورنمنٹ، زراعت، انہار کے علاوہ دیگر متعلقہ محکموں کے افسران نے شرکت کی۔
اس موقع پر ڈسٹرکٹ ایمرجنسی آفیسر نے اجلاس کو پری فلڈ ایمرجنسی پلان، سیلابی پانی سے بچاؤ کے حفاظتی اقدامات، جنگلات میں آگ بجھانے کے طریقہ کار، ممکنہ سیلاب سے بچاؤ کے سلسلے میں کیے جانے والے حفاظتی اقدامات، عید الفطر ایمرجنسی پلان کے ایجنڈے سے متعلق بریفنگ دی۔
اجلاس میں ڈپٹی کمشنر محمد تسلیم اختر راؤ نے اسسٹنٹ کمشنرز سمیت متعلقہ اداروں کے افسران کو ہدایت کی کہ مون سون شروع ہونے سے قبل دریائی اور برساتی نالوں کی جوائنٹ انسپکشن کی جائے اور سیلابی پانی سے آبادیوں کو محفوظ رکھنے کے لیے تمام حفاظتی بندوں کو مضبوط کیا جائے۔ انہوں نے ایکسئین ڈرینج کو ہدایت کی کہ نالوں کے پلوں اور کلوکٹس کے نیچے سے بروقت ڈی سلٹنگ کرائی جائے۔ انہوں نے متعلقہ افسران کو ہدایت کی کہ مون سون کے دوران کسی بھی ایمرجنسی سے نمٹنے کے لیے تمام مشینری کو ہمہ وقت فنکشنل رکھا جائے۔
ڈپٹی کمشنر نے محکمہ زراعت اور لائیو سٹاک کے افسران کو جانوروں کے لیے چارہ، ویکسین اور دیگر انتظامات بروقت مکمل کرنے کی ہدایت کی۔ انہوں نے سی ای او ہیلتھ کو کسی بھی ایمرجنسی کی صورت میں تمام ضروری ادویات، ویکسین اور میڈیکل کیمپس کے سلسلے میں انتظامات بروقت مکمل کرنے کی ہدایت کی۔
ڈپٹی کمشنر نے میونسپل کمیٹی اور ضلع کونسل کے افسران کو عید الفطر سے قبل پارکوں میں لگے جھولوں کے فٹنس سرٹیفکیٹ لینے کی ہدایت دی اور دریاؤں، نہروں میں نہانے والے افراد کے خلاف سخت قانونی کارروائی کرنے کے احکامات بھی جاری کیے۔
