سیالکوٹ(بیوروچیف شاہدریاض)کشمیر روڈ اور خواجہ صفدر روڈ کو ماڈل روڈ بنانے کے لیے کام کا آغاز کر دیا گیا ہے۔ مجوزہ روڈ پر ٹریفک سگنلز/سائن بورڈ، لائن اور لین مارکنگ سمیت انفراسٹرکچر کو بہتر بنایا جائے گا۔ ان روڈ پر ٹریفک قوانین کا سختی سے عملدرآمد کروایا جائے گا، اور بغیر ہیلمٹ اور سیٹ بیلٹ لگائے ان روڈ پر ڈرائیونگ کی اجازت نہیں ہوگی۔
یہ بات ایڈیشنل ڈپٹی کمشنر (جنرل) ایوب بخاری نے ڈی ایس پیز ٹریفک مبشر احمد اور محمد مدثر کے ہمراہ کشمیر روڈ اور خواجہ صفدر روڈ کی ماڈل روڈ ڈکلیئر کرنے کے انتظامی امور کا جائزہ لینے کے دوران بتائی۔
ایڈیشنل ڈپٹی کمشنر ایوب بخاری نے کہا کہ وزیر اعلیٰ پنجاب مریم نواز شریف کی ہدایت پر ماڈل ٹریفک روڈز ڈکلیئر کی گئی ہیں، جس کا مقصد ٹریفک قوانین کی پاسداری اور ٹریفک حادثات کا سدباب ہے۔ انہوں نے کہا کہ ان روڈ پر سپیڈ متعین کی جائے گی جبکہ رانگ پارکنگ پر بھی کارروائی کی جائے گی۔
انہوں نے بتایا کہ ماڈل روڈز ڈویلپمنٹ کے لیے ڈپٹی کمشنر سیالکوٹ محمد ذوالقرنین لنگڑیال نے میونسپل کارپوریشن کے مقامی حکام کو ڈویلپمنٹ پراجیکٹ کے پی ون بنانے اور فوری کام کروانے کی ہدایات جاری کر دی ہیں، اور جلد از جلد ان روڈ پر روڈ انجینئرنگ اور فرنیچر کے مسائل حل کرکے ٹریفک قوانین پر عملدرآمد کا آغاز کر دیا جائے گا۔
