کراچی: ڈسٹرکٹ جیل ملیر میں قید بھارتی شہری گورو ولد رام آنند نے خودکشی کرلی۔ جیل انتظامیہ کے مطابق، قیدی نے جیل کے واش روم میں جا کر پھندا لگا لیا، جس کے نتیجے میں وہ موقع پر ہی دم توڑ گیا۔
انتظامیہ کے مطابق، گورو کو 17 فروری 2022 کو جیل منتقل کیا گیا تھا۔ جیل حکام کا کہنا ہے کہ قیدی کی لاش سہراب گوٹھ میں واقع سرد خانے منتقل کردی گئی ہے اور واقعے کے حوالے سے مزید معلومات اکٹھی کی جا رہی ہیں۔ڈسٹرکٹ جیل ملیر کے سپرنٹنڈنٹ ارشد شاہ کے مطابق، یہ واقعہ 24 اور 25 مارچ کی درمیانی شب پیش آیا۔ جیل کے ڈاکٹروں نے موت کی تصدیق کے بعد لاش کو قانونی کارروائی کے لیے جناح اسپتال منتقل کر دیا۔ مزید برآں، سپرنٹنڈنٹ کا کہنا ہے کہ مجسٹریٹ کی زیر نگرانی قیدی کا پوسٹ مارٹم کیا جائے گا تاکہ موت کی حتمی وجوہات معلوم کی جا سکیں۔
جیل سپرنٹنڈنٹ کے مطابق، گورو کی قومیت اور دستاویزات سے متعلق بھارتی قونصلیٹ کے ساتھ مشاورت جاری تھی۔ وہ دیگر بھارتی قیدیوں کے ساتھ رہ رہا تھا، مگر جیل کے دیگر قیدیوں کے مقابلے میں کم گفتگو کرتا تھا۔
انتظامیہ کا کہنا ہے کہ اس واقعے کے تمام پہلوؤں پر تفصیلی تحقیقات کی جا رہی ہیں تاکہ خودکشی کے اسباب معلوم کیے جا سکیں۔ حکام بھارتی قونصلیٹ سے بھی رابطے میں ہیں تاکہ قانونی کارروائی کو جلد از جلد مکمل کیا جا سکے۔
