لاہور(باغی ٹی وی) وزیراعلیٰ پنجاب مریم نوازشریف نے ایڈز کے پھیلاؤ کی روک تھام اور متاثرہ آبادی کے تحفظ کیلئے مؤثر اور ٹھوس اقدامات کی ہدایت جاری کردی۔ تحصیل تونسہ میں مبینہ طور پر ایڈز کے کیسز میں اضافے کے بعد وزیراعلیٰ نے خصوصی اجلاس طلب کیا، جس میں صورتحال کا تفصیلی جائزہ لیا گیا۔
وزیراعلیٰ نے ایڈز کے پھیلاؤ کے اسباب اور ذمہ داروں کا تعین کرنے کی ہدایت دیتے ہوئے تحصیل تونسہ میں ایڈز کے سدباب کیلئے فوری آپریشنل پلان طلب کرلیا۔ اجلاس میں فیصلہ کیا گیا کہ یونیسف، عالمی ادارہ صحت (ڈبلیو ایچ او) اور محکمہ صحت پنجاب پر مشتمل جوائنٹ مشن قائم کیا جائے گا، جو 7 سے 14 اپریل تک متاثرہ بچوں کی ہسٹری ٹریسنگ کرے گا۔ یہ مشن ایڈز کنٹرول اور حفاظتی اقدامات سے متعلق سفارشات بھی پیش کرے گا۔
وزیراعلیٰ نے متاثرہ علاقوں میں ہاؤس ہولڈ اسکریننگ کرانے کا بھی حکم دیا، جبکہ تونسہ تحصیل ہیڈکوارٹر اسپتال اور دیگر طبی مراکز میں ایڈز کے علاج کیلئے خصوصی مراکز قائم کر دیے گئے ہیں۔ انہوں نے متاثرہ بچوں کے مکمل فری علاج کی ہدایت کرتے ہوئے واضح کیا کہ ان کے علاج میں کسی قسم کی کوتاہی برداشت نہیں کی جائے گی۔
