ڈیرہ غازیخان (باغی ٹی وی )پنجاب حکومت نے صوبے میں آؤٹ سورس کیے گئے دس ہزار سکولوں کے 47 ہزار اساتذہ کو ان سکولوں سے اپنا تبادلہ کرانے کا ایک اہم اور آخری موقع دیا ہے۔ پنجاب سکول ایجوکیشن ڈیپارٹمنٹ کی جانب سے اساتذہ کے تبادلوں کے لیے 7 اپریل سے ایک نیا آن لائن نظام متعارف کروایا جا رہا ہے، جس کے ذریعے اساتذہ گھر بیٹھے ہی اپنی منتقلی کی درخواستیں جمع کروا سکیں گے۔ یہ اقدام ان اساتذہ کے لیے ایک اہم موقع ہے جو آؤٹ سورس سکولوں میں کام کر رہے ہیں اور اپنے تبادلے کے خواہشمند ہیں۔
پنجاب سکول ایجوکیشن ڈیپارٹمنٹ میں بڑے پیمانے پر سکولوں کو آؤٹ سورس کرنے کا سلسلہ جاری ہے جو کہ محکمہ تعلیم اور اساتذہ کے درمیان ایک بڑا تنازعہ بھی بنا ہوا ہے۔ اب حکومت نے آؤٹ سورس سکولوں کے تقریباً 47 ہزار اساتذہ کو لازمی طور پر ان سکولوں سے تبادلہ کروا کر دوسرے سکولوں میں منتقل ہونے کا آخری موقع فراہم کیا ہے۔ اس فیصلے سے ان اساتذہ کو اپنی ملازمتوں کے مستقبل کے حوالے سے تحفظ فراہم کرنے کی کوشش کی گئی ہے۔
جاری کردہ نوٹیفکیشن کے مطابق جن سرکاری اساتذہ کی نوکریاں ان سکولوں میں تھیں جو اب آؤٹ سورس کر دیے گئے ہیں، انہیں دس دن کے اندر اندر اپنی پسند کی ایسی جگہ کا انتخاب کرنا ہوگا جہاں وہ اپنا تبادلہ کروانا چاہتے ہیں۔ واضح رہے کہ مقررہ دس دن کے اندر تبادلے کی درخواست جمع نہ کروانے والے اساتذہ کی نوکریاں ختم کر دی جائیں گی۔ یہ ایک سخت شرط ہے جس سے اساتذہ کو فوری طور پر تبادلے کے لیے درخواست دینے کی ترغیب دی گئی ہے۔
یاد رہے کہ گذشتہ روز بھی ایک خبر سامنے آئی تھی کہ محکمہ سکول ایجوکیشن پنجاب نےآئوٹ سورس کئے جانیوالے سکولوں میں اساتذہ اور دیگر سٹاف کی پوسٹیں ختم کرنے کا فیصلہ کرلیا۔ مجموعی طور پر40 ہزار سے زائد پوسٹیں ختم کی جارہی ہیں۔ سرکاری سکولوں کے اساتذہ کی 15 فیصد کے قریب پوسٹیں ختم کی گئیں، مختلف سکیلز کی 43 ہزار 960 پوسٹیں ختم کی جارہی ہیں۔
فیصلہ سکولوں کو آؤٹ سورس کرنے کی وجہ سے کیا گیا، مجموعی طور پر 10 ہزار کے قریب سکول آؤٹ سورس کئے گئے ہیں، آؤٹ سورس ہونے والے سکولوں کے اساتذہ کو قریبی سکولوں میں ٹرانسفر کیا جائیگا۔ اساتذہ کی جانب سے پوسٹیں ختم کرنے پر تشویش کا اظہار کیا گیا ہے، اساتذہ کا کہناکہ محکمہ سکول ایجوکیشن کا مستقل سیٹوں کو ختم کرنا افسوسناک ہے۔
