اوکاڑہ (نامہ نگارملک ظفر) والدین کی غفلت، تین بچے آگ کی لپیٹ میں آکر جاں بحق
اوکاڑہ کے نواحی قصبے 31 جی ڈی میں ایک دلخراش واقعے میں، والدین کی غفلت کے باعث گھر میں آتشزدگی سے 2 کمسن بھائی اور ان کی بہن جھلس کر جاں بحق ہو گئے۔
پولیس کے مطابق قصبہ 31 جی ڈی کے رہائشی زاہرے خان کے 3 کمسن بچے ایک ہی چارپائی پر چادر اوڑھے سو رہے تھے اور گھر والوں نے مچھر سے بچاؤ کے لیے چارپائی کے قریب اُپلے جلا رکھے تھے۔ پولیس کا کہنا ہے کہ اُپلوں کی آگ بستر کی چادر کو لگی جس نے تینوں بچوں کو اپنی لپیٹ میں لے لیا۔ آگ سے 4 سالہ شیزہ اور 2 سالہ قمر موقع پر ہی جاں بحق ہو گئےجبکہ 7 سالہ عبداللہ کو تشویشناک حالت میں ہسپتال منتقل کیا گیا مگر وہ بھی جانبر نہ ہو سکا۔
ڈپٹی کمشنر احمد عثمان جاوید نے بچوں کی ہلاکت پر گہرے دکھ اور افسوس کا اظہار کیا۔ ان کے احکامات پر ایڈیشنل ڈپٹی کمشنر ریونیو محمد ابراہیم ارباب اور اسسٹنٹ کمشنر ممتاز سوگوار خاندان کے گھر پہنچے۔ ضلعی انتظامیہ نے جاں بحق بچوں کی تدفین کے اخراجات اٹھائے اور اپنی نگرانی میں بچوں کو سپرد خاک کیا۔
ڈپٹی کمشنر احمد عثمان جاوید نے کہا کہ ضلعی انتظامیہ آتشزدگی سے جھلس کر فوت ہونے والے بچوں کے لواحقین کے غم میں برابر کی شریک ہے۔ انہوں نے حکومت پنجاب سے فوت ہونے والے بچوں کے والدین کی مالی امداد کے لیے فوری درخواست کرنے کا بھی اعلان کیا۔
ڈپٹی کمشنر نے محکمہ سول ڈیفنس کو آتشزدگی کے باعث قیمتی جانوں کے ضیاع کو روکنے کے لیے موثر عوامی آگاہی مہم چلانے کی ہدایت کی۔ انہوں نے سکولوں، کالجوں اور یونیورسٹیوں میں طلباء کو فائر سیفٹی اقدامات سے آگاہ کرنے پر زور دیا۔
