اوچ شریف (نامہ نگارحبیب خان) پل فاروق آباد کے رہائشی بزرگ شخص ملک رشید سمیجہ نے بااثر افراد کی جانب سے زندگی اجیرن کرنے پر احتجاج کرتے ہوئے ڈسٹرکٹ پولیس آفیسر اسد سرفراز خان اور ایس ایچ او نوشہرہ جدید صدیق احمد ڈھڈی سے انصاف کا مطالبہ کیا ہے۔
ملک رشید سمیجہ کا کہنا تھا کہ پولیس تھانہ نوشہرہ انہیں تحفظ فراہم کرے کیونکہ ان کے اپنے ہی جان کے دشمن بن گئے ہیں۔ انہوں نے بتایا کہ ان کی اہلیہ عظیم خاتون بی بی کے حصے میں 40 سال قبل ان کے والد اللہ رکھا کی جانب سے ایک کنال رقبہ دیا گیا تھا، جسے اب ان کی اہلیہ کے بھائی خلیل، جلیل، کالا اور دیگر غنڈہ عناصر واپس لینا چاہتے ہیں۔
ملک رشید سمیجہ نے الزام لگایا کہ ان کے بچوں کے گزرنے کا راستہ اور گھر کی چار دیواری توڑ دی گئی ہے اور انہیں آئے روز تشدد کا نشانہ بنایا جاتا ہے۔ انہوں نے وزیراعلیٰ پنجاب مریم نواز اور متعلقہ انتظامیہ سے سخت نوٹس لے کر ملزمان کے خلاف کارروائی کا مطالبہ کیا ہے۔
