میرپور ماتھیلو ،باغی ٹی وی(نامہ نگارمشتاق علی لغاری) گھوٹکی پولیس کی بروقت کارروائی سے اوباڑو کے علاقے کموں شہید سے لاپتہ ہونے والا 9 سالہ بچہ عامر علی چاچڑ والدین سے جا ملا۔
نواب علی چاچڑ نے تھانہ اوباڑو میں بیٹے کے لاپتہ ہونے کی اطلاع دی تھی، جس پر ایس ایس پی گھوٹکی ڈاکٹر سمیع اللہ سومرو نے بچے کی فوری تلاش کے احکامات جاری کیے۔ پولیس نے ضلع بھر کے تھانوں کو اطلاع دی اور سرچ آپریشن شروع کیا۔
ایس ایچ او تھانہ بی سیکشن محمد قابل بھیو نے اپنی ٹیم اور ذرائع کے ذریعے کچھ ہی دیر میں گمشدہ بچے کو تلاش کرلیا۔ ضروری قانونی کارروائی کے بعد بچے کو بحفاظت والدین کے حوالے کردیا گیا۔
ایس ایس پی گھوٹکی ڈاکٹر سمیع اللہ سومرو نے بچے کی بازیابی پر ایس ایچ او بی سیکشن اور ان کی ٹیم کو شاباش دی۔ والدین نے پولیس کی بروقت کارروائی پر شکریہ ادا کیا۔
