سیالکوٹ (باغی ٹی وی، سٹی رپورٹر مدثر رتو ) دی سٹی سکول اقبال کیمپس سیالکوٹ میں ایک شاندار اور معلوماتی سالانہ "گلوبل ولیج” سمپوزیم کا انعقاد کیا گیا، جس میں جونیئر ون سے سینئر ون تک کے 700 طلبہ و طالبات اور ان کے والدین نے بھرپور شرکت کی۔
اس دلچسپ ایونٹ میں طلبہ نے 37 مختلف ممالک کی نمائندگی کرتے ہوئے ان کی تہذیب، ثقافت، سیاست، سیاحت، قدرتی اور انسانی وسائل اور ان کو درپیش چیلنجز کو انتہائی خوبصورتی اور مہارت سے پیش کیا۔ "گلوبل ولیج” کے تھیم کے تحت لگائے گئے نمائشی کیمپوں میں طلبہ نے ان ممالک کی ثقافت، روایات، ملبوسات اور طرزِ زندگی کی عمدہ عکاسی کی۔
دی سٹی سکول اقبال کیمپس کی پرنسپل فاطمہ عمر نے مہمانوں اور والدین کے ہمراہ طلبہ، اسکول انتظامیہ اور اسٹاف کی اس شاندار کاوش کو خوب سراہا۔ والدین نے اس موقع پر اظہار خیال کرتے ہوئے کہا کہ اس طرح کے پروگرام نہ صرف بچوں میں خود اعتمادی پیدا کرنے میں معاون ثابت ہوتے ہیں بلکہ ان میں عالمی شعور اور مختلف ثقافتوں کے لیے ہم آہنگی کے جذبے کو بھی فروغ دیتے ہیں۔
سمپوزیم میں طلبہ و طالبات نے مختلف ممالک کی ثقافت، موسیقی اور رقص پر مبنی دلکش پرفارمنسز پیش کیں، جو حاضرین کو بہت پسند آئیں۔
"گلوبل ولیج” سمپوزیم کا باضابطہ افتتاح پرنسپل فاطمہ عمر نے اسکول انتظامیہ کے ساتھ مل کر رنگ برنگے غبارے فضا میں چھوڑ کر کیا۔ اس موقع پر انہوں نے طلبہ کی محنت اور لگن کی تعریف کی اور اس ایونٹ کو ٹیم ورک، محنت اور تخلیقی صلاحیتوں کا بہترین امتزاج قرار دیا۔ انہوں نے کامیاب پروگرام کے انعقاد پر اکیڈمک، سکول انتظامیہ، تدریسی عملے، ایڈمن اور صفائی کے عملے کی شبانہ روز محنت کو سراہا۔
پرنسپل فاطمہ عمر نے مزید کہا کہ "گلوبل ولیج” صرف ایک تفریحی ایونٹ ہی نہیں بلکہ طلبہ کی تعلیمی، تخلیقی اور سماجی صلاحیتوں کو نکھارنے کا ایک شاندار موقع بھی فراہم کرتا ہے، جس سے انہیں دوسرے ممالک اور قوموں کے رہن سہن اور بین الاقوامی مسائل و چیلنجز کو سمجھنے میں مدد ملتی ہے۔
