ڈاکٹرغلام مصطفی بڈانی
ننکانہ صاحب (باغی ٹی وی، نامہ نگار: احسان اللہ ایاز)بابا گورو نانک یونیورسٹی ننکانہ صاحب میں شعبہ فزکس اور آفس آف ریسرچ، انوویشن اینڈ کمرشلائزیشن (ORIC) کے اشتراک سے دو روزہ سمپوزیم بعنوان "سسٹین ایبل انرجی” کا کامیاب انعقاد کیا گیا۔ اس علمی و تحقیقی تقریب کا مقصد پائیدار توانائی سے متعلق آگاہی، تحقیق اور قومی و عالمی سطح پر قابلِ عمل مکالمے کو فروغ دینا تھا۔
سمپوزیم کے پہلے روز ممتاز ماہرین تعلیم اور توانائی کے شعبے سے وابستہ ماہرین نے پائیدار توانائی کے موضوع پر مفصل خطابات کیے۔ مقررین میں پروفیسر ڈاکٹر یاسر جمیل، ڈاکٹر حفیظ انور، محمد فاروق (ایکسین، این ٹی ڈی سی)، اور ڈاکٹر لاریب کرن شامل تھے۔ ان ماہرین نے ایس ڈی جی اہداف، پاکستان کے توانائی بحران، بیٹری اسٹوریج سسٹمز اور شمسی توانائی جیسے موضوعات پر مفصل روشنی ڈالی۔
پہلے روز کے اختتامی اجلاس میں چیئرمین شعبہ فزکس ڈاکٹر نصیب احمد نے مہمان مقررین کا شکریہ ادا کیا جبکہ رجسٹرار جناب مبشر طارق نے معزز مہمانوں کو اعزازی شیلڈز پیش کیں۔
دوسرے روز طلبہ کی جانب سے پوسٹر پریزنٹیشنز کا اہتمام کیا گیا جس میں شعبہ فزکس کے طلبہ نے پائیدار توانائی سے متعلق تحقیقی منصوبے پیش کیے۔ پوسٹر مقابلے کے ججز میں ڈاکٹر قدسیہ مشتاق (شعبہ زولوجی)، ڈاکٹر عدیل غفار (شعبہ بوٹنی)، اور محترمہ عمارہ ارشاد (شعبہ کیمسٹری) شامل تھیں، جنہوں نے طلبہ کی پیشکشوں کا غیرجانبدارانہ جائزہ لیا۔
اس کامیاب سمپوزیم کے انعقاد میں ڈاکٹر ہاشم فاروق (اسسٹنٹ پروفیسر) اور جناب ارسم دانش (لیکچرار شعبہ فزکس) نے کلیدی کردار ادا کیا۔ اختتامی تقریب میں شریک طلبہ کو اسناد سے نوازا گیا، جنہیں ان کی تحقیقی محنت اور جذبے کا اعتراف قرار دیا گیا۔
یہ دو روزہ علمی سرگرمی نہ صرف طلبہ کے لیے علم کا مؤثر ذریعہ ثابت ہوئی بلکہ توانائی کے شعبے میں تحقیق، تعلیم، صنعت اور پالیسی سازی کے درمیان روابط کو فروغ دینے کی جانب ایک مثبت قدم بھی ثابت ہوئی۔
