ننکانہ صاحب,باغی ٹی وی( نامہ نگار احسان اللہ ایاز)ڈسٹرکٹ ہیڈ کوارٹر ہسپتال ننکانہ صاحب کے ارتھوپیڈک ڈیپارٹمنٹ نے ایک اور سنگ میل عبور کرتے ہوئے طبی تاریخ میں اہم کامیابی حاصل کی ہے۔ معروف آرتھوپیڈک سرجن اور ہیڈ آف ڈیپارٹمنٹ، ڈاکٹر رانا افتخار محی الدین کی قیادت میں ارتھوپیڈک ٹیم نے جدید طبی سہولیات کے تحت ایک مریضہ کے کولہے (Hip Joint) کی کامیاب ٹوٹل ہِپ ریپلیسمنٹ (THR) سرجری انجام دی۔ مریضہ کی کولہے کی ہڈی میں خون کی روانی متاثر ہو جانے کے باعث جوڑ مکمل طور پر ناکارہ ہو چکا تھا جسے جدید طریقہ علاج کے ذریعے کامیابی سے بحال کیا گیا۔
یہ شاندار کارنامہ ایسے ہسپتال میں سرانجام دیا گیا جہاں سہولیات ملک کے بڑے اور جدید ہسپتالوں کے معیار کی نسبت محدود ہیں، تاہم ڈاکٹر رانا افتخار محی الدین اور ان کی ٹیم کی مہارت نے ان کمیوں کو آڑے نہیں آنے دیا۔ واضح رہے کہ ڈاکٹر رانا افتخار محی الدین اس سے قبل بھی درجنوں پیچیدہ آرتھوپیڈک آپریشنز، جن میں مختلف اقسام کے فریکچرز، جوڑوں کی تبدیلی اور ہڈیوں کی پیچیدہ بیماریوں کا کامیاب علاج شامل ہے، بخوبی انجام دے چکے ہیں۔
ڈاکٹر رانا افتخار محی الدین اور ان کی ٹیم کی اس شاندار کامیابی پر ننکانہ صاحب کے سیاسی، سماجی اور عوامی حلقوں کی جانب سے زبردست خراج تحسین پیش کیا جا رہا ہے۔ عوامی مطالبہ زور پکڑ گیا ہے کہ حکومت پاکستان ڈاکٹر رانا افتخار محی الدین کی دکھی انسانیت کے لیے بے لوث خدمات کے اعتراف میں انہیں "ستارہ امتیاز” جیسے اعلیٰ ترین سول ایوارڈ سے نوازے۔ شہریوں نے انہیں خدمت خلق کا درخشندہ پیکر قرار دیتے ہوئے کہا کہ ڈاکٹر رانا افتخار محی الدین اپنی شبانہ روز محنت اور جذبہ خدمت کے ذریعے قوم کے ان عظیم سپوتوں میں شامل ہو چکے ہیں جو خاموشی سے انسانیت کی خدمت میں مصروف ہیں۔
عوام نے ان کی کامیابی پر خوشی کا اظہار کرتے ہوئے ان کے لیے نیک تمناؤں کا اظہار بھی کیا ہے اور توقع ظاہر کی ہے کہ ڈاکٹر رانا افتخار محی الدین کی خدمات کو قومی سطح پر سراہا جائے گا۔
