کراچی: اورنگی ٹاؤن کے علاقے میں پیپلزپارٹی کے یوسی چیئرمین عامر بھٹو کے قتل کے معاملے میں نئی معلومات سامنے آئی ہیں۔ ذرائع کے مطابق، یہ قتل علی شاہ اور حماد صدیقی نے مل کر منصوبہ بندی کی تھی، اور اس واردات کے لیے اجرتی قاتلوں سے ایک لاکھ روپے میں ڈیل کی گئی تھی۔
ذرائع کے مطابق، قتل کی منصوبہ بندی کرنے والے افراد نے عامر بھٹو کی نماز جنازہ اور سوئم میں بھی شرکت کی تھی۔ ملزمان کا یوسی چیئرمین سے کئی معاملات پر تنازعہ چل رہا تھا، جس کے نتیجے میں یہ افسوسناک واقعہ پیش آیا۔
دوسری جانب کراچی کے علاقے ڈیفنس فیز ٹو میں پولیس اور ملزمان کے درمیان مبینہ مقابلہ ہوا جس میں ایک ملزم ہلاک ہوگیا۔ پولیس نے ہلاک ملزم کی شناخت قاسم عرف مانی کے نام سے کی ہے۔ ذرائع کے مطابق، قاسم پر عید کے دوران ایک شخص کو ڈکیتی مزاحمت پر قتل کرنے کا الزام تھا۔پولیس نے تحقیقات کا آغاز کر دیا ہے اور مزید ملزمان کی گرفتاری کے لیے کارروائی جاری ہے۔
