سیالکوٹ (باغی ٹی وی بیوروچیف شاہد ریاض) پسرور کے نواحی گاؤں چونڈہ کے قریب افسوسناک واقعہ پیش آیا جہاں ایک شخص ہارویسٹر مشین کے نیچے آ کر جاں بحق ہو گیا۔ واقعہ پسرورچونڈہ روڈ پر اس وقت پیش آیا جب 45 سالہ شبیر نامی شخص مشین کی مرمت میں مصروف تھا۔
تفصیلات کے مطابق شبیر ہارویسٹر مشین کے نیچے جیک لگا کر مرمت کر رہا تھا کہ اچانک جیک ٹوٹ گیا، جس کے نتیجے میں بھاری مشین اس پر آن گری اور وہ موقع پر ہی دم توڑ گیا۔
واقعہ کی اطلاع ملتے ہی ریسکیو 1122 کی ٹیم موقع پر پہنچی، ضروری کارروائی مکمل کرنے کے بعد متوفی کی لاش ورثاء کے حوالے کر دی گئی۔ شبیر کی ناگہانی موت پر علاقے میں افسوس کی لہر دوڑ گئی ہے۔
شبیر کی موت نہ صرف اہل خانہ بلکہ اہل علاقہ کے لیے بھی ایک صدمہ ہے، جنہوں نے حکومت سے مزدوروں کے تحفظ کے لیے مزید اقدامات کا مطالبہ کیا ہے۔
