ڈاکٹرغلام مصطفی بڈانی
اسلام آباد(باغی ٹی وی رپورٹ) وفاقی کابینہ نے آرمی چیف جنرل سید عاصم منیر (نشانِ امتیاز ملٹری) کو فیلڈ مارشل کے اعلیٰ ترین عسکری عہدے پر ترقی دینے کی باقاعدہ منظوری دے دی ہے۔ اس تاریخی فیصلے کا اعلان وزیراعظم شہباز شریف کی زیر صدارت منعقدہ وفاقی کابینہ کے اہم اجلاس کے بعد کیا گیا۔
وزیراعظم نے اجلاس میں گفتگو کرتے ہوئے کہا کہ پاکستان حال ہی میں اپنی تاریخ کے ایک کٹھن مرحلے سے کامیابی سے گزرا۔ انہوں نے 6 اور 7 مئی 2025 کی رات بھارتی جارحیت کو "معرکۂ حق” قرار دیتے ہوئے کہا کہ دشمن نے بلا اشتعال اور بلاجواز حملہ کرکے نہ صرف پاکستان کی خودمختاری اور سرحدی سالمیت کو چیلنج کیا بلکہ سول آبادی میں معصوم شہریوں، خواتین اور بچوں کو بھی نشانہ بنایا۔
وزیراعظم نے کہا کہ پاک فوج نے "آپریشن بنیانِ مرصوص” کے تحت بروقت اور مؤثر کارروائی کرکے دشمن کے ناپاک عزائم کو خاک میں ملا دیا۔ وزیراعظم نے اس شاندار کامیابی پر پوری قوم کو مبارکباد دیتے ہوئے جنرل سید عاصم منیر کی دلیرانہ عسکری قیادت کو سراہا اور انہیں پاکستان کے دفاع، خودمختاری اور علاقائی سالمیت کو یقینی بنانے پر فیلڈ مارشل کے عہدے پر ترقی دینے کی تجویز کابینہ کے سامنے رکھی، جسے متفقہ طور پر منظور کر لیا گیا۔
وفاقی کابینہ نے اپنے اعلامیہ میں کہا کہ آرمی چیف نے مثالی جرات، عزم اور حکمتِ عملی سے نہ صرف پاک فوج کی قیادت کی بلکہ تمام مسلح افواج کی جنگی صلاحیتوں اور آپریشنل ردِعمل کو ہم آہنگ کرکے پاکستان کو ایک تاریخی عسکری فتح سے ہمکنار کیا۔ کابینہ نے واضح کیا کہ یہ فیصلہ جنرل عاصم منیر کی بہادری، قائدانہ صلاحیتوں اور ملکی دفاع کے لیے ان کی غیر معمولی خدمات کے اعتراف میں کیا گیا ہے۔
وزیراعظم شہباز شریف نے بعد ازاں صدرِ مملکت آصف علی زرداری سے ملاقات کی اور اس فیصلے پر انہیں اعتماد میں لیا۔ ایوانِ صدر سے اس سلسلے میں آئینی منظوری کی توقع کی جا رہی ہے۔
اجلاس میں ایئر چیف مارشل ظہیر احمد بابر سدھو کی خدمات کو بھی سراہا گیا اور ان کی مدتِ ملازمت مکمل ہونے کے باوجود ان کی قیادت میں تسلسل جاری رکھنے کا فیصلہ کیا گیا۔ مزید برآں، وفاقی کابینہ نے یہ بھی اعلان کیا کہ آپریشن بنیانِ مرصوص کے دوران شاندار خدمات انجام دینے والے افواجِ پاکستان کے افسران، جوان، غازیان، شہداء اور دیگر شعبہ ہائے زندگی سے تعلق رکھنے والے پاکستانیوں کو قومی اعزازات سے نوازا جائے گا۔
پاکستان کی تاریخ میں فیلڈ مارشل کا عہدہ محض علامتی نہیں بلکہ ملک کے اعلیٰ ترین عسکری اعزازات میں شمار ہوتا ہے۔ اس سے قبل پاکستان کے پہلے فیلڈ مارشل جنرل محمد ایوب خان کو یہ رینک دیا گیا تھا۔ جنرل عاصم منیر کو یہ رینک دے کر حکومت نے اس بات کا اعتراف کیا ہے کہ ان کی قیادت میں نہ صرف دشمن کو منہ توڑ جواب دیا گیا بلکہ پاکستان کے دفاع کو ناقابل تسخیر بنایا گیا۔
یہ فیصلہ نہ صرف فوجی تاریخ کا سنگِ میل ہے بلکہ پوری قوم کے لیے ایک پیغام بھی ہے کہ پاکستان کی سلامتی پر کوئی سمجھوتہ نہیں ہوگا اور ہر جارحیت کا بھرپور جواب دیا جائے گا۔
