ڈاکٹرغلام مصطفی بڈانی
میرپور ماتھیلو (باغی ٹی وی، نامہ نگار مشتاق علی لغاری) ڈہرکی کی گلاب شاہ کالونی میں پینے کا پانی زہریلا ہو گیا ہے، جس سے علاقے میں موزی امراض پھیلنے کا شدید خدشہ پیدا ہو گیا ہے۔ ماڑی پیٹرولیم کمپنی کی جانب سے لگایا گیا آر او پلانٹ کرپشن کی نذر ہو چکا ہے۔ علاقہ مکینوں نے ڈپٹی کمشنر سکھر، وزیراعلیٰ سندھ، اور کمپنی کے اعلیٰ حکام سے فوری نوٹس لے کر آر او پلانٹ کی سہولیات بحال کرنے کا مطالبہ کیا ہے۔
مقامی رہائشی مفتی گل محمد سمیجو اور دیگر معززین نے بتایا کہ پانی کی لیبارٹری ٹیسٹنگ سے معلوم ہوا کہ اس کا آر ٹی ایس لیول 682,656 ہے، جو انسانوں اور حیوانات کے لیے مضر ہے۔ اس زہریلے پانی کے استعمال سے امراض پھیلنے کا خطرہ بڑھ گیا ہے۔ شہریوں نے کہا کہ ماڑی پیٹرولیم کمپنی کی جانب سے نصب آر او پلانٹ کرپشن کی وجہ سے ناکارہ ہو چکا ہے، جس سے صاف پانی کی فراہمی ناممکن ہو گئی ہے۔
علاقہ مکینوں نے خبردار کیا کہ زہریلے پانی سے پیدا ہونے والی بیماریوں کی ذمہ داری ایم پی اے، ایم این اے، سرداروں، وڈیروں، اور ماڑی پیٹرولیم کمپنی کے افسران پر ہو گی۔ انہوں نے واضح کیا کہ اگر اس پانی سے کوئی مرض لاحق ہوا یا جانی نقصان ہوا تو ذمہ داروں سے سخت احتساب کیا جائے گا۔ شہریوں نے ڈپٹی کمشنر سکھر اور وزیراعلیٰ سندھ سے مطالبہ کیا کہ فوری طور پر آر او پلانٹ کی مرمت یا متبادل سہولیات فراہم کی جائیں۔ انہوں نے کہا کہ اگر بروقت اقدامات نہ کیے گئے تو وہ احتجاج پر مجبور ہوں گے۔
