وفاقی وزیر منصوبہ بندی احسن اقبال کی زیر صدارت سینٹرل ڈیولپمنٹ ورکنگ پارٹی (سی ڈی ڈبلیو پی) کا اجلاس منعقد ہوا، جس میں 104 ارب روپے مالیت کے ترقیاتی منصوبوں کی منظوری دی گئی۔
وزارت منصوبہ بندی کے جاری کردہ اعلامیے کے مطابق اجلاس میں 96 ارب روپے کے 3 بڑے منصوبے قومی اقتصادی کونسل (ایکنک) کو بھجوا دیے گئے ہیں، جبکہ 8 ارب روپے مالیت کے 4 منصوبے سی ڈی ڈبلیو پی نے خود منظور کر لیے۔اعلامیے کے مطابق صنعت و تجارت کے 2 منصوبے بھی منظور کیے گئے، جن میں "1000 سلائی یونٹس فیز 2” شامل ہے جس کی لاگت 1.95 ارب روپے ہوگی۔ اس کے علاوہ ایس ایم ای فیسیلیٹیشن سینٹرز کی زمین کی خریداری کے لیے 1.25 ارب روپے مختص کیے گئے ہیں۔
ایک اہم پیش رفت میں، پاکستان کی پہلی قمری گاڑی منصوبے کے لیے 2.53 ارب روپے جبکہ انسان بردار خلائی مشن منصوبے کے لیے 2.24 ارب روپے کی منظوری دی گئی ہے، جو ملکی خلائی ترقی کے لیے ایک سنگ میل ثابت ہوں گے۔مزید برآں، سندھ میں سڑکوں کے بڑے منصوبے بھی ایکنک کو ارسال کیے گئے ہیں، جن میں سانگھڑ تا روہڑی سڑک کی تعمیر پر 36.91 ارب روپے اور روہڑی تا گڈو بیراج نئی سڑک کے منصوبے شامل ہیں۔ مہران ہائی وے کو نواب شاہ تا راجن پور دو رویہ بنانے کا 41 ارب روپے کا منصوبہ بھی ایکنک کو بھیجا گیا ہے۔
اجلاس کے دوران وزیر منصوبہ بندی احسن اقبال نے تمام منصوبوں کی لاگت کو مارکیٹ ریٹس کے مطابق رکھنے کی ہدایت دی تاکہ وسائل کا مؤثر استعمال یقینی بنایا جا سکے۔
وفاقی بجٹ اب 10 جون کو پیش کیا جائے گا، آئی ایم ایف سے مذاکرات جاری
23 اور 24 مئی کو آندھی، گرد آلود ہوائیں، گرج چمک کے ساتھ بارش کی پیش گوئی
