پاکستان نے بنگلادیش کے خلاف تین میچز کی ٹی 20 سیریز کے پہلے میچ میں 37 رنز سے کامیابی حاصل کر لی اور سیریز میں 1-0 کی برتری حاصل کرلی۔
قذافی اسٹیڈیم لاہور میں کھیلے گئے اس میچ میں پاکستان نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 201 رنز بنائے۔گرین شرٹس کی اننگز کا آغاز اچھا نہ تھا اور ابتدائی دو وکٹیں صرف 5 رنز کے مجموعے پر گر گئیں۔ تاہم بعد میں سلمان علی آغا اور محمد حارث نے مل کر 48 رنز کی شراکت قائم کی۔ محمد حارث 53 کے مجموعے پر 31 رنز بنا کر آؤٹ ہوئے۔ اس کے بعد کپتان سلمان علی آغا اور حسن نواز نے مل کر 65 رنز کی شراکت قائم کی اور اسکور کو 118 رنز تک پہنچایا۔
سلمان علی آغا نے شاندار بلے بازی کرتے ہوئے 34 گیندوں پر 56 رنز بنائے جن میں 8 چوکے اور 1 چھکا شامل تھا۔ حسن نواز نے 44 رنز کی مفید اننگز کھیلی، جبکہ شاداب خان نے 48 رنز بنائے۔ فہیم اشرف 11 اور حسن علی 1 رن بنا کر ناٹ آؤٹ رہے۔بنگلادیش کی جانب سے بولنگ میں شریف الاسلام نے 2 کھلاڑیوں کو آؤٹ کیا جبکہ رشاد حسین، شمیم حسین، حسن محمود، مہدی حسن اور تنظیم حسن نے ایک، ایک وکٹ حاصل کی۔
جواب میں بنگلادیش کی ٹیم 202 رنز کے ہدف کے تعاقب میں 19.2 اوورز میں 164 رنز پر ڈھیر ہو گئی۔ بنگلادیش کی جانب سے کپتان لٹن داس نے سب سے زیادہ 48 رنز بنائے جو کہ انہوں نے صرف 30 گیندوں پر 3 چھکوں کی مدد سے اسکور کیے۔ دیگر نمایاں بیٹرز میں ذاکر علی 36 اور تنزید حسن 31 رنز کے ساتھ شامل رہے۔
بنگلادیش کے توحید ہردوئی نے 17، شریف الاسلام نے 5، پرویز حسین، شمیم حسین، اور رشاد حسین نے 4، 4 رنز اسکور کیے۔ مہدی حسن نے 2 اور تنظیم حسن نے 1 رن بنایا جبکہ حسن محمود 9 رنز کے ساتھ ناٹ آؤٹ رہے۔پاکستان کی شاندار باؤلنگ کا مظاہرہ کرتے ہوئے حسن علی نے 5 کھلاڑیوں کو پویلین کی راہ دکھائی۔ شاداب خان نے 2 وکٹیں حاصل کیں جبکہ فہیم اشرف، خوشدل شاہ اور سلمان علی آغا نے ایک، ایک وکٹ حاصل کی۔
شاداب خان کو ان کی آل راؤنڈ پرفارمنس، جس میں 48 رنز، 2 وکٹیں اور 2 کیچز شامل تھے، پر میچ کا بہترین کھلاڑی قرار دیا گیا۔اس میچ میں پاکستان کی فائنل الیون میں فخر زمان، صائم ایوب، محمد حارث، سلمان علی آغا، حسن نواز، شاداب خان، خوشدل شاہ، فہیم اشرف، حسن علی، حارث رؤف اور ابرار احمد شامل تھے۔
بنگلادیش کی ٹیم میں تنزید حسن، پرویز حسین، لٹن داس، توحید ہردوئی، مہدی حسن، ذاکر علی، شمیم حسین، رشاد حسین، تنظیم حسن، حسن محمود اور شریف الاسلام شامل تھے۔
میچ سے قبل ٹاس کے وقت پاکستان کے کپتان سلمان علی آغا اور بنگلادیشی کپتان لٹن داس میدان میں اترے۔ پاکستان نے ٹاس جیت کر پہلے بیٹنگ کا فیصلہ کیا۔ ٹاس کے بعد گفتگو کرتے ہوئے سلمان علی آغا نے کہا کہ وکٹ بیٹنگ کے لیے اچھی لگ رہی ہے اور ٹیم کے تمام کھلاڑی اچھی فارم میں ہیں۔
یوم تکبیر،مرکزی مسلم لیگ کے ملک گیر پروگرام، عوام کا جوش وجذبہ،پاک فوج کے حق میں نعرے